Jornal Timor Post - Kinta-feira, 04 Outubru 2012
Ministru Edukasaun Bendito Freitas hakfodak ho kondisaun Eskola Ensino
Baziku no Sekundariu Nobel da Paz Dili, tanba kondisaun
infra-estrutura Eskola refere la merese atu sai hanesan eskola ida.
Vizita supreza Ministru edukasaun ho nia ekipa horseik ba Eskola Novel
da Paz, Kintal Boot, Dili, tanba hetan karta konvite husi parte Eskola
Nobel da Paz, ne’ebe husu Ministeriu Edukasaun atu haruka ekipa ida ba
haree kondisaun eskola ne’e.
Maibe bainhira Ministru no delegadu tun husi kareta, Ministru nia
matan hateke ba edifisiu Eskola ne’e hakfodak hodi dehan, ida ne’e mak
eskola Nobel da Paz!!!!
Bainhira Ministru ho nia ekipa tama, estudante no professor sira bilan
no hakfodak, tanba lahatene konaba vizita ne’e.
Kondisaun infra-estrutura Eskola ne’e grave tebes, tanba laiha
odamatan, janela, moru uma, kakuluk kalen dodok ona, iha sala laran
semente nakfila ba rai rahun, estudante tur senamalu tanba sala 4
de’it ne’ebe fahe ho tripleks, kondisaun klot no nakukun bainhira
prosesu aprendizazen la’o.
Hafoin rona tiha preokupasaun husi professor no Diretor Eskola,
Ministru Edukasaun Bendito Freitas promete, iha 2013 sei tau
prioridade ba eskola ne’e hodi rezolve situasaun infraestrutura,
professor voluntariu barak iha teritoriu laran ne’e,” dehan Ministru
edukasaun.
Nune’e, Diretor Eskola Pedro Nunez Menezes dehan, Eskola ne’e,
preparadu atu tuir izame nasional iha tinan ne’e, maibe estudante
finalista eskola ensino Baziko no Sekundariu, sei haruka ba tuir izame
iha Eskola 10 de dezembru, Comoro, Dili, Eskola Nobel da Paz hari’I
iha 2002.
Total estudante Ensino Baziku no Sekundariu hamutuk 657 ho Profesor
permanente 27 no professor kontratadu no volontariu hamutuk 13.
.
Sem comentários:
Enviar um comentário
Nota: só um membro deste blogue pode publicar um comentário.