“Membru Governu Mal Gastus”

.

Jornal Timor Post - Kinta-feira, 04 Outubru 2012 

Parlamentu Nasional (PN) liu husi Komisaun Espesializadas Permanente nota (catat) iha membru Governu balun ne’ebe mal-gastus tanba to’o ona iha tinan klaran maibe la konsege ezekuta orsamentu to’o 50%. 

Prezidenti Komisaun F trata asuntu saude, Edukasaun, kultura, Veteranus no Igualidade Jenero, Virgilio da Costa Hornai hateten kestaun ne’e ba Timor Post iha Parlamentu Nasional, Kuarta (03/10). 

 Nia hatutan, tuir loloos to’o ona tinan klaran ne’e Ministeriu hotu nia ezekusaun tenki atinji ona 50% ka bele liu. Virgilio dehan, orsamentu ba Ministeriu hotu preve tuir ona item ida-idak nian, tanba ne’e, nia afirma, Ministeriu ida-idak tenki ezekuta halo didiak hodi nune’e bele responde nesesidade povu nian. 

Virgilio husu ba membro governu hotu atu aslera ezekusaun atu nune’e labele to’o tinan nia rohan orsamentu sei tomak hela hodi mosu fali carry over, enkuantu nesesidade iha baze presiza tebes. 

Iha parte seluk, segundu Vise Prezidenti parlamentu nasional, Aderito Hugo da Costa informa, kalendariu ba debate orsamentu retifikativu aprova tiha ona husi komisaun espesializada hotu, inklui bankada 4 ne’ebe ezisti. 

“Debate sei hahu husi loron 10-23 tuir regras ne’ebe estabelesidu,” Hugo tenik. Nia mos hatuir tan katak, oras ne’e dadaun iha ona faze preparasaun relatoriu pareser husi komisaun sira, depois sei submete ba iha komisaun C assuntu Ekonomia no Financas, hafoin halo elaborasaun ba relatoriu pareser komisaun sira nian, no aprezenta ba Prezidenti Parlamentu atu prepara ajenda plenaria. 

.