Labarik Porsentu 42 Mal Nutrisaun “Feto Adultos 32%”

.

Jornal Nacional Diario - Kuarta-feira, 10 Outubru 2012 

Dadus Kondisaun mal nutrisaun ne’ebe aprezenta husi klinika Bairo Pite iha tinan 2012 ne’e katak, labarik kuaze porsentu 42 mak moris iha mal nutrisaun nian laran. 

Fenomena mal nutrisaun ne’e la’os sofre deit husi labarik ka kosok oan sira, maibe tuir dadus ne’ebe iha mos katak, feto adoltus porsentu 32 iha Timor Leste mos sofre mal nutrisaun. 

 Director Klinika Bairo Pite, dr. Daniel Murphy esplika katak, mal nutrisaun ne’ebe tinan ba tinan kontinua haterus labarik lubun boot no feto afultus sira iha rai doben ida ne’e, tanba maioria povu ne’e sei moris iha linha pobreza nia okos. 

Ho kondisaun moris ne’ebe susar tebes no kiak ba ai han ne’e, katak Daniel Murphy fasil liu atu hamosu mal nutrisaun, liu-liu ba inan isin rua sira ne’ebe sei moris iha linha pobreza nia laran. 

 “Ita Timor sei hetan kazu mal nutrisaun, tanba maioria ita nia povu sei moris iha kiak nia laran,” hateten Direktor Klinika Bairo Pite, dr. Daniel Murphy ba Jornalista sira iha nia servisu fatin, Bairo Pite, Dili, Tersa (09/10). 

Ho kiak ne’e, tuir dr. Daniel Murphy, mak halo povu sira susar tebes atu hetan ou konsume hahan ne’ebe iha valor nutrisaun. 

 “Labarik mal nutrisaun ne’e barak liu iha area remotas, tanba fatin izoladu ne’e make ma moris kiak barak no susar tebes iha kbi’it atu konsume hahan ho valor nutrisaun,” hateten Daniel Murphy.

 Nia dehan tan katak, mal nutrisaun ne’e risku la halimar ba inan isin rua sira, tanba ne’e, inan feton sira ne’ebe mak kous dau-daun ona kosok oan iha isin tenki halo sakrifisiu oituan hodi bele konsume hahan ne’ebe iha valor nutrisaun, hanesan ikan, na’an manu, ai-fuan, modo tahan no susu ben. 

Nune’e mos, kazu mal nutrisaun ne’e la’os rejistu deit iha klinika Bairo Pite, maibe Sentru Saude Formosa, Dili, mos rejista kazu mal nutrisaun ne’e hamutuk 59 kazu. REsponsavel ba mal Nutrisaun iha Sentro Saude Formosa, Isabel Lilis, hateten pasientes hirak ne’ebe afetadu ba kondisaun mal nutrisaun ne’e maioria labarik tinan lima mai kraik ho nia kilograma hitu mai kraik.

.