“CNRT-FRETILIN Hamutuk Tane Interese Nasaun”

,

Jornal Nacional Diario - Segunda-feira, 22 Julhu 2013 

Prezidenti Partidu Congresu Nacional Resistencia Timor-Leste (CNRT), Kay Rala Xanana Gusmao deklara katak, CNRT ho Partidu Frente Revolusionaria Timor-Leste Independenti (FRETILIN) desidi atu hamutuk, tanba atu tane aas interese nasaun nian ba povu ba moris diak. 

“Ami hamutuk ho FRETILIN, katuas Mari Alkatiri mos iha ne’e, tanba atu haree no tane interese nasaunnian bo’ot liu duke interese privadu,” dehan Xanana Gusmao bainhira loke konferensia Partidu CNRT ba da ruak iha Centro Convencoens Dili (CCD), Sabadu (22/7). 

Maske lider maximu partidu CNRT ne’e la esplika detalles konaba kontestu Politika CNRT no FRETILIN nian ne’ebe hamutuk ne’e, maibe Xanana esplika deit katak, FRETILIN no CNRT hamutuk tanba interese nasional, la’os interese partidu ida-idak nian. Ho ida ne’e Prezidenti Partidu CNRT ne’e, husu mos ba resonsavel Partidu CNRT nian iha Distritu hotu atu hato’o ezemplu ida ne’e, koopera ho komponente social no partidu sira seluk iha Distritu, tanba sira mak servi povu iha Distritu. 

 “Foin dadauk ita boot sira mos kala akompania, hau liu husi ita boot sira nia uma fukun sira ne’e hotu, atu koalia kona ba preparasaun desentralizasaun, iha ne’eba partidu sira hamrik hamutuk dehan, keta fahe povu tanba ita atu desentralzia planu governu, maibe partisipa iha debates ho hanoin, i partidu sira mos tenki kolabora ho komponentes social sira iha baze,” Xanana haktuir. 

Xanana dehan, partidu atu boot to’o iha ne’ebe mos, tenki submete duni ba nasaun nia interese, tanba nasaun no ninia sistema mak partidu hotu mosu ezizste. “Ita hotu sei lembra, ita hotu hasoru malu iha ne’e depois de eleisaun, konferensia desidi atu lahamutuk ho FRETILIN, maibe lao hamutuk ho bloku, ida ne’e desizaun soberanu husi partidu,” akresenta Xanana. 

Prezidenti Partidu CNRT atual Primeiru Ministru ne’e mos akresenta katak, konferensia ida ne’e loke atu koalia loloos saida mak responsavel partidu Distritu ida-idak haree, hodi ema seluk kritika, maibe tenki kritika ho diak. Maibe katak Xanana, la’os atu lori fali kritika ida neebe selok malu, tu’u malu tanba hahalok ida ne’e la permiti iha partidu laran. 

 “Hanesan hau nia kompadre Mari Alkatiri hateten dehan, ei pa la kleur se imi mak kaer Governu iha 2017, imi boot liu fali F-FDTL,” relata Xanana. Tuir Xanana, maske lia fuan sira ne’e halimar deit, maibe ne’e preokupasaun boot ida, tanba dala ruma ema seluk fo nia kritika labele hateten katak, ida ne’e atu minimiza buat hotu. 

“Maibe ida ne’e hanesan atu bolu atensaun ba governu ida ne’e atu kuidadu,” Xanana esplika. 

Xanana informa katak, iha partidu laran hateten, ema ne’ebe sala, sala duni, ema ne’ebe los tenki los. 

Tanba ne’e konferensia ida ne’e atu buka solusaun bas ala sira ne’ebe ema komete tiha ona durante ne’e,” Xanana deklara. 

 Partisipa iha konferensia ne’e, Sekretariu Jeral Partidu FRETILIN Mari Alkatiri, Sekretariu Jeral Partidu PD Mariano Asanami Sabino, korpus diplomatiku sira husi nasuan sira hanesan, Estadus Unidus Amerika (EUA), Australia, Portugal, Indonesia, Filipina no Thailandia. 

,