PSHT Konsidera PNTL Viola Lei “Pedro Aparicio: Ami Sei Keixa Polisia Ba Tribunal”

.

Jornal Nacional Diario - Sesta-feira, 26 Julhu 2013

Sejretariu Jeral “Persaundaraan Setia Hati Terate” (PSHT), Pedro Aparicio Guterres Konsidera operasaun Polisia Nasional Timor Leste (PNTL) tama sai ema nia uma iha kalan boot hodi perturba ema nia deskansa hatudu momos violasaun ba lei, tamba rezolusaun nia karakter laos lei.

“Kona ba rezolusaun implementasaun PNTL nian iha terenu oin seluk, kalan polisia tama sai uma rekoilha atributu artemarsiais, ema balun tato iha nia isin simblu organizasaun polisia kaer, hau hanoin polisia kontra ona lei, tamba rezolusaun Governu ne’e, la’os lei, maibe orden ne’ebe hateten aktividade artemarsial para, iha implementasaun PNTL viola ona,” Sekretariu jeral PSHT Pedro Aparicio Guterres informa ba Jornalista sira nia kna’ar fatin aimutin, Kinta (25/7).

Tuir Pedro Aparaicio Guterres, rezolusaun ne’ebe governu hasai iha pontu rua, taka aktividade grupu arte marsiais no husu Membru Polisia Nasional Timor Leste (PNTL) no FALINTIL-Forca Defeza Timor Leste (F-FDTL) atu labele involve an iha grupu artemarsiais, maibe iha terenu Polisia implementa oin seluk.

Rezolusaun Governu hasai iha loron 10 Julhu, kontiudu rezolusaun atu hapara atividade artemarsiais, PSHT mos aseita rejolusaun refere e kumpri, maibe realidade dadaun ne’e iha terenu aktividade trenu nafatin, ida ne’e mak polisia iha kompetensia tomak hodi atua, nota bene, polisia atu atua tenki tuir baze legal ne’ebe vigora iha Timor Leste, liu-liu liga ho kodiku prosesu penal.

Basa iha kodigu prosesu penal hateten, wainhira ezekuta mandatu kapturasaun tenki iha karta kapturasaun, hare ba implementasaun rezolusaun no erru ne’ebe mak PNTL komete iha prosesu tama sai uma iha kalan boot, Pedro dehan, Polisia mak implementador lei maibe, sira rasik la kumpriende lei ne’ebe mak sira ezekuta.

Realidade arte marsiais kumpri orden maibe, polisia kontinua tama sai uma hodi preturva fila fali ema nia direitu fundamentais seluk. “Hau rona informasaun katak, kalan tuku 09.00 Otl ba leten, ema labele tur iha luron, ne’e informasaun ne’ebe la los, se ema tur hamutuk koalia halimar ne’e sira nia direitu,” informa Pedro.

Nia mos kontinua dehan katak, PSHT sei halo keixa ba atetude Polisia hasoru nia membrus sira ba Ministeriu Publiku relasiona ho operasaun PNTL tama sai uma foin lalais ne’e.

 Entertantu, Directur interenu Asosiasaun HAK Manuel Monteiro reforsa katak, artigu 43 aleinea premeiru katak, ema hotu-hotu hetan liberdade ba asosiasaun ho hanoin ida neebe la halo violensia no halo tuir lei haruka, tanba ne’e wainhira hare polisia tama ema nia uma iha kalan boot ne’e hatudu katak, Polisia kontra ona lei.

 “Realidade ami hare iha terenu, polisia nia atuasaun dala barak la tuir realidade ne’ebe akontese, husi nee haree katak, autoridade polisia balun servisu la tuir lei no orden, tamba ne’e sira fo orientasaun ba nia membrus atu implementa iha terenu la tuir lei ho orden, no polisia viola lei mak barak,” Manuel Monteiro dehan.

Nia dehan tan katak, desizaun Governu taka grupu arte marsiais sei la rezolve problema, tamba problema nia hun laos maka grupu arte marsiais, maibe kampu servisu, ho kampu servisu mak bele redus numeru violensia.

Nune’e, hata’an kona ba informasaun Arte marsiais 400 PSHT nian ba posse iha Atambua ho Kupang no Indonezia, Sekretariu Jeral PSHT dehan ne’e isu de’it, e sadik atu hatudu evidensia.

Wainhira halo klarifikasaun la iha evidensia PSHT sei lori polisia nafatin ba Tribunal tanba konsidera polisia fo informasaun falsu ba publiku (pembohongan Publik).

“Konstituisaun RDTL artigu 40 katak, ema hotu-hotu iha direitu ba liberdade koalia nian no direitu atu hetan informasaun ruma no tan informasaun lolos nian, tanba ne’e ami sei halo keixa ba Tribunal no Ministeriu Publiku hodi halo investigasuan klean, tanba ho informasaun ne’ebe fo sai on abele halo foer naran organizasaun arte marsiais sira, tamba faktus ami la haruka membrus sira ba pose iha Indonesia, maibe komando PNTL anunsia publiku la ho realidade,” Pedro Aparicio argumenta.

,