“FM: REzidensia Ofisial Motael La Seguru Ba PR Taur”

.

Foto de, Tempo Semanal

Jornal Nacional Diario - Kinta-feira, 11 Julhu 2013 

Organizacao Nao Govermental (ONG) Fundasaun Mahein (FM) haree katak, rezidensial ofisial ne’ebe lokaliza iha Motael-Dili, la seguru ba xefe Estadu Taur Matan Ruak atu hela iha fatin refere. 

 Rezidensia ofisial ne’ebe mak Governu halo iha Motael, antes ne’e distina ba membru Governu ida partikularmente ba Ministeriu Finansa, maibe ikus mai dudu fali ba Prezidenti Republika. 

“Iha rai ne’ebe de’it Estadu sempre fo fatin dignu ba Xefe Estadu maibe iha ambitu ida ne’e FM nia haree katak, hanesan ameasa ba Xefi Estadu tanba razaun seguransa.

 Premeiru, rezidensia ofisial ne’e besik ho Jardim no konsentrasaun publiku nian, segundu, estrada ibun, terseiru, hela iha komunidade nia leet, kuartu besik hi Igreja, no kintu, portaun tama sai ida de’it,”

  hateten Diretor FM ba Jornalista sira liu husi Kofnerensia ba imprensa, Kuarta (10/7) iha Balide, Dili. 

Direktor FM ne’e hatutan, ho kestaun seguransa FM haree katak risku no ameasa hasoru Prezidenti Republika potensial tebes atu akontese. 

 “Ami rekomenda ba Prezidenti Republika no Primeira Dama presiza deklara ba povo Timor-Leste, tuir informasaun ne’ebe espailla iha komunidade nia leet ne’ebe Prezidenti Republika sei simu rezidensia ofisial ne’e, maske inisiu destina ba rezidensia membru Governu, maibe ikus tenta dudu ba Prezidenti Republika maka atu hela, ami nia haree ne’e la serve ba PR atu hela tanba la seguru,” nia hatutan. 

FM mos hakarak rekomenda ba Servico Nacional Intelegensia presiza halo survei intelejensia iha ambiente refere no postura rezidensia ofisial ne’e rasik tuir padraun servisu intelejensia nian no mos Casa Militar, no Polisia presiza halo estudu seguransa baze ba ameasa no risku sira ne’ebe sei afeita ba rezidensia ne’e, karik rezidensia ofisial ne’e dudu ba Prezidenti Republika.

.