Mosu Nepotismu Iha ME, “Bendito: Director Balun Sei Troka”

.

Jornal Nacional Diario - Kinta-feira, 11 Julhu 2013 

Ministru Edukasaun (ME) Bendito Freitas ameasa sei troka directores balun iha Ministeriu Edukasaun (ME), tanba deskonfia pratika nepotismu iha Diresaun Nasional Ensinu Superior Universitariu (DNSU) hodi legaliza diploma Alumni Universidade Nasional Timor Lorosa’e (UNTL) no Univeridade da Paz. 

Bendito Freitas hateten katak, funsionariu no diretur sira ne’ebe mak halo nepotismu iha Ministeriu laran sei troka no sei hasai husi nia kargu, tamba Ministeriu Presiza ema ne’ebe servisu professional no la involve interese privadu. 

“O labele mai tur iha Ministeriu ne’e hodi atende de’it ba o nia primu, tiun, tian sira, ne’e labele akontese iha Ministeriu ida ne’e nia laran, diak liu ita troka tiha sira ne’ebe mak halo hanesan ne’e iha Ministeriu ida ne’e,” hateten Bendito Freitas ba Jornalista sira, Kuarta (10/07) iha salaun enkontru Ministeriu Edukasaun, Vila Verde, Dili. 

Ministru Edukasaun rasik promete sei halo medida ba sira ne’ebe mak involvidu iha aktu nepotizmu ba legalizasaun diploma UNTL no UNPAZ hodi haruka nia ema sira mak mai halo legalizasaun diploma, ne’eduni situasaun ida ne’e labele akontese. 

“Ne’e trava, ne’e labele akontesetanba ita nia servisu ne’e laos atu haree ba familia no grupu, nudar Timoroan hotu presiza tratamentu ne’ebe hanesan iha servisu fatin,” Bendito Freitas dehan maibe la temi detaillus ema ne’ebe mak envolve iha pratika nepotismu ne’e. nia mos husu ba funsionariu no diretor sira tenke servisu tuir regulamentu ne’ebe mak iha, duke halo Ministru nia ulun moras. 

“Karik la tuir regulamentu sira labele hanoin dehanMinistru la brani atu troka, maibe funsionariu no diretor ne’ebe halo problema diak liu hasai duke halo hau nia ulun moras,” hateten Bendito. 

Ministru mos akresenta liu tan katak, tempu badak sei buka dalan atu haree problema ne’ebe mosu iha ME, maibe importante liu mak prosesu transparante labele husik buat sira ne’e akontese iha ME nia laran.

.