“FP Servisu Sabraut, Sala Husi Prosesu Rekrutamentu”

.

Jornal Nacional Diario - Tersa-feira, 16 Julhu 2013 

Sosieade sivil konsidera funsionariu publiku (FP), balun halo servisu sabraut maske estadu fasilita sira ho ekipamentus, hahalok mosu mai husi prosesu rekrutamentu, tanba la tau ema tuir background no prosesu rekrutamentu nakonu ho nepotismu. 

 “Problema ne’e mosu husi prosesu rekruta, fo servisu ba ema ne’ebe nia backgroud ne’ebe la cocok, no iha prosesu ne’e nakonu ho nepotizmu,” Direktur Ezekutivu ONG Luta Hamutuk, Mericio Akara relata asuntu ne’e iha segunda (15/7) iha nia kna’ar fatin Farol, Dili. 

Nia hatutan, funsionariu publiku dala barak sira gasta tempu barak liu halo aktividade ne’ebe laos kna’ar FP nian hanesan halimar game iha tempu servisu, la displina oras no iha fim de semana tula familia pasiar ho kareta estadu. 

“Nia fo ezemplu, ema ne’e nia hatene liu mate-matika ba fali iha administrasaun, administrasaun publika ba fali iha agrikultura, balun agrikultura ba fali iha teknika, ida ne’e buat ne’ebe mosu iha FP la detekta,” dehan nia. 

 Mericio afirma, KFP la hili ema tuir nia skill, nune’e atu bele tau ema iha fatin los, tanba tuir Luta Hamutuk nota kuaze FP 70% servisu la tuir ida-idak ninia bacground. 

 “Ita bele dehan kuaze 70% funsionariu publiku dala ruma servisu laos ho nia bacground, maibe tanba deit nia hatene ingles, portugues no komputador mas la hatene saida mak nia atu halo,” tenik nia. 

 Tanba ne’e nia husu diak liu reviw hanesan halo mutasi ba idaidak nia profesionalizmu serviso atu nune’e iha efisiensia no efikasia.

,