“Lu-Olo: V Governu Tenki Halo Remodelasaun Radikal”

.

Jornal Nacional Diario - Tersa-feira, 09 Julho 2013 

Prezidenti Partidu FRETILIN Francisco Guterres Lu-Olo, fo hanoin lideransa V Governu Konstitusional atu hadia an, hanesan halo remodelasaun ida ne’ebe mak klean iha ninia strutura no sistema, selae povu sei la sente benefisiu dezenvolvimentu husi orsamentu ne’ebe mak hetan aprovasaun iha Parlamentu Nasional kada tina-tinan. 

“Membru Governu hau haree ba iha vontade atu serviso, sente hanesan espirito patriota, nasionalismu iha, maibe sira servisu ladiak, sistema la diak impede ema nia kapasidade atu assume ninia responsablidade atu halo servisu, tanba ne’e liga ba remodelasaun nian, hau dehan hanesan ne’e, remodela ne’e, remodela de’it ema ka? 

Remodela mos sistema hotu, tenki iha remodelasaun ida ne’ebe mak klean,” Prezidente Partidu FRETILIN Francisco Guterres Lu-Olo fo hanoin liu husi konferensia Imprensa iha sede Comite Central FRETILIN, Comoro, segunda (8/7). 

Tuir Lu-Olo nia opiniaun, problema kursial ne’ebe mak akontese iha V Governu Konstitusional alias Bloku Koligasaun (BK) mak sistema, politiku no lei organiku Governu nian, tanba ne’e atu halo remodelasaun presiza tetu hotu asuntu hirak ne’e, nune’e remodelasaun akontese karik tenki remodela ho profundu (klean). 

Nudar Prezidenti Partidu Opozisaun, Francisco Guterres Lu-Olo, deklara katak, FRETILIN la duvida ba deklarasaun Primeiru Ministru kay Rala Xanana Gusmao atu halo remodelasaun ba estruktura governu BK nian, maibe FRETILIN ejiji e hakarak hatene katak, metode remodelasaun saida mak sei akontese, sera que remodelasaun atu muda deit ema ka ou muda buat hotu-hotu ne’ebe mak sai lacunas iha governu nia laran. 

“Se hakarak atu involve FRETILIN iha remodelasaun, tenki iha akordu, maske pozisaun ne’e ba dasa rai mos,” Lu-Olo deklara pozisaun FRETILIN nian. maske isu kona ba remodelasaun ne’ebe mak sei akontese, involve lideransa partidu FRETILIN, maibe tuir sasin Prezidenti Partidu FRETILIN rasik to’o ohin loron seidauk iha aprosimasaun ruma husi parte Governu hanesan Primeiru Ministru ba FRETILIN. 

 Ba pontu de vista FRETILIN nia rasik bazeia ba deklarasaun Primeiru Ministru Kay Rala Xanana Gusmao, dala ruma remodelasaun sei akontese muda deit ema ida husi fatin ida ba fatin seluk, maibe karik nune’e, politika remodelasaun ne’e sei la iha folin, maibe FRETILIN kontinua apoia. 

Laos kritika, maibe ne’e mak realidade, povu kontinua halerik ba problema infra-estrutura baziku, agrikultura, edukasaun, saude no asuntu seluk ne’ebe mak liga diretamente ba moris povu nian, maibe Lu-Olo dehan, osan miloens ba miloens kada tinan-tinan Parlamentu Nasional aprova, nia rejultadu hatudu momos povu kontinua halerik ba problema ne’ebe mak hanesan, fukun ida ne’ebe los?? 

Governu ida hanesan ne’e presiza kurizi aan, tanba prinsipiu ukun atu servi povu hodi fo moris diak ba povu. 

Erru seluk ne’ebe mak Governu BK komete, mosu ‘over leping’ iha sistema servisu nian, mal administrasaun, koluzaun, nepotismu, e korrupsaun hatudu momos espansaun (haluan) iha estrutura governu nian, hodi fo konsekuensia ba despeza estadu nian, maibe la fo produsaun diak ba povu nia moris. 

 Bazeia ba problema hirak ne’e, hein katak remodelasaun sei fo solusaun ida ba problema sira ne’e hotu. 

.