Saude La Sama Hetan Rekopera “La Sama Rekonese Sorte Nia Hetan Pozisaun Diak, Imposivel Povu Ki’ik Sira Nia Saude”

.

Notisia Husi TVTL - Tersa-Kalan, 10 Julhu 2013 

Vice Primeiru Ministru (PM) Fernando La Sama de Araujo rekopera hikas hafoin halo tiha tratamentu durante semana 3 iha Hospital Elisabeth Singapura. 

 Ohin (8/7) Fernando La Sama de Araujo fila hikas mai Timor-Leste, ne’ebe akompania husi familia ho Aviaun, Governante ne’e rekopera ona husi nia moras ne’ebe nia sofre. Fernando La Sama de Arajo agradese ba entidades tomak ne’ebe akompania nia durante tratamentu. 

 “Aproveita oportunidade ne’e fo agradese ba maluk hotu-hotu nia orasaun, hotu-hotu iha rai laran no mos iha rai liur, hau senti haksolok tamba bele hetan fali saude diak, hau mos ho oportunidade ne’e husu ba maluk sira ne’ebe uluk fuma dor hanesan hau, diak liu redus fuma ba, tamba nia impaktu la diak ba ita nia saude, hau sorte hanesan iha pozisaun ne’ebe diak tamba ne’e mak bele governu tau matan, imposivel ba povu baibain atu hetan tratamentu hanesan hau, ne’e ita lalika bosok malu, laos diskriminasuan maibe ne’e realidade, dotor mos husu atu redus hemu tua no tenki deskansa durante fulan hirak nia laran mak bele kontinua fali servisu,” deklara La Sama. 

Oras ne’e dadaun governante ne’e hetan ona kondisaun ne’ebe diak, maibe tuir rekomendasaun husi mediku sira katak, presiza deskansa fulan rua to’o fulan tolu nia laran hafoin bele kontinua aktividade govermentar.

.