“Defensor Publiku Defende De’it Ema Iha Osan”

.

Jornal Independente - Kuarta-feira, 17 Julhu 2013 

Deputadu iha Parlamentu Nasional (PN) no sosieade sivil kestiaona maka’as kona ba prestasaun servisu defensor publiku, ne’ebe durante ne’e abandona povu kbi’it laek atu hetan justisa. 

Tuir rejultadu peskizasaun Provedores Direitus Humanus no Justica (PDHJ) tinan 2014 nian hatudu katak, volume servisu defensor publiku hodi halo defensoria ba povu kbiit laek ka povu kiak no mukit atu hetan justisa menus liu. 

Deputadu no sosieade sivil apoiu relatoriu PDHJ ne’e, tanba realdiade hatudu duni mos iha sira nia rejultadu monitorizasuan no observasaun katak, defensor publiku barak liu defende ema iha klase ekonomia as duke povu kbiit laek sira. 

Prezidenti Komisaun A Carmelita Moniz kestiaona ida ne’e tanba politika estadu hamosu defensoria publika atu halo defesa ba populasaun la iha kbiit atu selu iha prosesu justisa. 

“Estadu hamosu defensoria publiku ho hanoin ida katak ita nia ekonomia povu nian la to’o no kbiit laek atu lori sira nia prosesu ba tribunal maibe sira laiha kapasidade ekonomia atu selu advogadu no defensor atu defende sira iha Tribunal,” dehan nia. 

Instituisaun Defensoria publiku ne’e Governu mak harii no selu ho hanoin katak, sira ba defende sidadaun ne’ebe ekonomia fraku no la husu pintes ida husi povu bainhira defende iha Tribunal. 

 “Hau nuudar deutada no Timor-oan, eziji ba sira atu defensoria publiku hala’o kna’ar nakonu ho responsablidade no profesionalizmu inklui halo kna’ar tuir lei, defende povu sein interese ruma, liliu pobu ne’ebe laiha kapasidade ekonomia, hau triste bainhira relatoriu PDHJ hateten katak sira (defensoria publika) la halo defesa masimu ba ita nia povu mukit no kiak, ne’e sala bot ona tanba la tuir na rsponsablidade,” dehan nia. 

 Iha fatin ketak, Diretur Judisial Sisitem Monitoring Programe (JSMP), Luis Oliveira Sampaio hatete, defensoria publiku nia papel atu defende povu kbiit laek sira iha seitor justisa, maibe, iha pratika JSMP haree duni defensor publiku sira dala barak abandona povu kiik atu hetan justica. 

 “Sim ami mos iha preokupasaun kona ba papel defensoria publiku tuir sira nia estatutu, tanba sira mai ho karakteristika natureza fo mandatu ba sira atu servisu hodi fo apoiu legal ba ema kbiit laek, maibe na realdiade la dun tau atensaun maka’as,” dehan Luis Oliveira iha nia kna’ar fatin (26/7). 

 Luis hatutan, iha argumentu husi defensoria publiku katak, situasuan sira ne’e eziji hanesan ne’ebe, maibe JSMP nia haree importante defensor publiku tenke asegura povu kbiit laek sira atu hetan oportunidade diak liu duke ema sira ne’ebe iha osan. 

,