“Timor-oan Konfronto Iha Inglatera, Polisia Kaptura 19”

.

Jornal Independente - Kuarta-feira, 10 Julhu 2013

Timor-oan kuaze ema nain 30 ataka malu ho sasan kroat hanesan katana no sasan kroat seluk iha Inglatera, Britannia Corner, iha loron Domingo lorokraik (7/7) foin lalais. 

Iha konfrontasaun ne’e, laiha ema kanek no mate, Polisia Inglatera konsege kaptura ema nain 19 ho elikoptru.

Oras ne’e, Polisia husik fila fali ema nain 19 hafoin halo interogasaun hodi hein investigasaun tuir mai.

Tuir Notisia Scunthorpe Telegraph, ne’ebe diariu ne’e asesu katak, Timor-oan sira ne’e hataka malu halo komunidade iha Inglatera paniku no tauk, tanba konforntasaun ne’e akontese iha Frodingham Road (fatin halao atividade negosiu nian).

 Polisia lokal iha Inglatera identifika grupo Timor-oan ne’e liu husi CCTV, oras ne’e volume patroilamentu iha ne’eba aumenta, tanba deskonfia konflitu sei mosu iha loron seluk tuir mai.

To;o oras ne’e, polisia seidauk identifika motivu husi konfrontasaun ne’e, maibe polisia lokal ida hateten, konfrontasaun ne’e mosu kontinuasaun husi konflitu kikoan ida entre komunidade Timor-oan sira ne’ebe hela iha Scunthorpe, sabadu antes.

 Entertantu, Vice Ministru Negosiu Estranjeiru, Constrancio Pinto hateten, Governu Portugal mak tenke responsablidade kazu Trabaldor Timor-oan iha nasaun Englatera tanba governu Portugal mak fasilita.

“Ita tenki iha akordu ida ho Governu Portugal, labele abandona nia responsablidade,” dehan nia iha PN (9/7). Tuir nia, Timor-aon neebe servisu iha Englatera ne’e laos ona sidadaun Timor-leste maibe sidadaun Portugal, tanba ne’e, dehan nia kuandu kazu ida akontese iha nasaun Englatera ne’e tenki aplika ona lei sidadania Portugal nian.

“Se kunadu Portugal abandona nia responsablidade klaru katak ita (Timor) apoiu maibe ne’e ita haree kazu por kazu ona, mais informasaun lolos kona ba kazu oho malu ka baku malu iha Englatera seidauk iha,” nia hatutan.

 Atu minimiza situasaun ne’e, nia afirma, embaizador TL iha nasaun Englatera sei loke iha tempu badak, no fulan oin (Agustu) komesa ekipa ida atu ba nasaun Englatera atu halo abertura.
.