“Advogadu Lucia Husu Suspende Juis Nain 7”

,

Jornal Nacional Diario - Sesta-feira, 19 Julhu 2013 

Ekipa advogadu prizioneira Lucia Lobatu nian ne’ebe lidera husi Jose Pedro Camoes, halo ona pedidu ida ba MInisteriu Publiku (MP) hodi husu suspensaun ba juis nain 7. 

 Juis nain 7 ne’ebe mak ekipa advogadu Lucia Lobatu nian husu suspende mak hanesan, Juis Delindo, Gulhermino, Orlando Cid, Jose Goia ho Maria Natercia. 

Pedidu ekipa advogadu Lucia nian ne’e halo bazeia ba pedido MP nian ne’ebe hatam ba Tribunal Rekursu no foin sai iha semana rua liu ba atu halo suspende ba Claudio Ximenes atu labele tama tan ba iha rekursu foun Lucia Lobatu nian. 

“Tuir MP Claudio Ximenes lakon ona nia idnependenti hanesan juis, tanba foin lalais, Claudio halo intervista ho media kona ba prosesu Lucia Lobatu nian,” informa Jose Camoes ba jornalista iha Tribunal Distrital Dili, Kinta (18/7). 

 Advogadu Lucia Lobatu konsidera juis nain 7 ne’e tama hotu ona iha prosesu rekursu Lucia Lobato kompostu husi rekursu extra-ordinariu ho rekursu inkonstitusionalidade, tanba ne’e, tuir ekipa advogadu Lucia nian atak, juiz nain 7 ne’e la merese ona atu tama tan iha prosesu rekusu foun Lucia Lobato nian. 

 Suspende empedementu ba juis sira ne’e, esplika Jose Pedro, tuir artigu 38 alinea a codigu prosesu penal Timor Leste, kona ba impedementu apresiasaun juis sira nian ba iha kazu ruma. 

Jose Pedro esplika katak, Pedidu ne’e tuir lei durante loron 10 nia laran MP tenki resposta pedidu husi advogado Lucia Lobato ne’e.

,