“Operasaun PNTL Ba Artemarsiais Hahu Ona”

.

Jornal Independente - Kuarta-feira, 10 Julhu 2013 

Polisia Nasional Timor-Leste (PNTL) hala’o ona operasaun konjunta durante oras 24 nia laran ba grupu artemarsiais neebe mak kontinua kontra rezolusaun Governu. 

Bazeia ba rezolusaun Governu nian katak, artemarsiais ne’ebe mak durante ne’e kria instabildiade hodi povu inosente sai vitima atu labele eziste ona iha rai ne’e. Komandante Operasaun Nasional Superitendenti Xefi Armando Monteiro hateten, operasaun ba artemarsiais ne’e hahu ona iha loron domingo (6/7), operasaun ne’e, kompostu husi Polisia Task Force ho Unidade Espesial Polisia (UEP). 

 Maski nune’e, komandante operasaun ne’e lakohi temi numeru Polisia ne’ebe hatu’un tiha ona, tanba dehan segredu operasaun nian ba interese estabildiade nasional. 

“Ami nia membru sira ne’e halao operasaun no partiliamentu rutina iha tempu kalan no loron iha bairu sira ne’ebe mak ami identifika ona,” hateten Armando ba Independente iha kuartel jeral PNTL Kaikoli (9/7). 

Nia dehan, iha operasaun primeiru, polisia konsege kaptura ema nain 3 ne’ebe mak lori sasan kroat hanesan tudik no katana hodi hein malu iha dalan ninin, dira nain tolu ne’e entrega ona ba komando Polisia Distritu Dili. “Ami nia operasaun ne’e ami konsege kaptura duni ema nain tolu ne’ebe mak deskonfia envolve iha grupu organizasaun sira ne’e hodi halo investigasaun ba sira atu hatene sira nia rambu sira iha fatin seluk,” hateten Armando. 

Operasaun no patroilamentu hala’o iha area Beto Barat, Luru Mata, Merkadu Komoro, Manleuana, Kuluhun, Taibesi no fatin seluk ne’ebe ne’ebe mak identifkia artemarsiais sira sei ativu treinu no area risku ba konflitu. Komandante Armando identifika katak, konflitu sira neebe mosu iha bairo sira iha Dili laran ne’e, hala’o husi grupu organizadu. 

 “Tanba ne’e mak sira halo konflitus ruma espontanitas deit depois para ona no mosu fali iha fatin seluk ho kuntiudu hanesan espontanitas deit,” dehan nia. 

Nia dehan tan katak, oras ne’e dadaun situasaun jeral iha fatin sira ne’ebe sempre mosu konflitus hanesan, Beto, Merkadu Komoro, no Kuluhun lao normal fali ona, tanba polisia hala’o ona vezilansia durante 24 oras. Planu ne’e sei implementa iha Distritu hotu no oras ne’e hahu ona implementa dadaun iha Distritu Ermera, Aileu no Likisa. 

Antes ne’e, segundu komandante PNTL Komisariu Afonso de Jesus deklara ona katak, taka aretmarsiais ne’e rai sei la nabeen. Nune’e mos, komandante F-FDTL Major Jeneral Lere Anan Timur mos deklara katak, estadu iha forsa atu baku ema, hakanek ema no oho ema ne’ebe kria instabilidade iha rai laran. 

 Iha parte seluk, Primeiru Ministru Kay Rala Xanana Gusmao mos la tolera ona artemarsiais ne’ebe hamosu konflitu hodi ema inosente sai vitima ba beibeik, nia dehan, artemarsiais ne’e demais liu ona, tenke taka atu labele eziste tan. 

PM Xanana hatutan tan katak, antes ne’e lider artemarsiais halo serimonia ritual hodi zura hodi hemu bibi raan, manu raan, dala ruma mos hemu tan fahi raan maibe kontinua kria konflitu, nune’e governu deklara sei la hamaus ona artemarsiais ne’ebe ativa treinu iha kalan-kalan.

,