“Ministeriu 5 Laiha Transparansia Aprovizionamentu”

.

Jornal Nacional Diario - Sesta-feira, 19 Julhu 2013 

Soseiade sivil konsidera iha Ministeriu lima (5) mak laiha transparansia iha prosesu aprovizionamentu tenderizasaun, tanba laiha numeru referensia tender nia no mos la publika montante osan projeitu. 

 Ministeriu lima ne’ebe sosieade sivil sira identifika ne’e mak, Ministeriu Saude, (MS), Ministeriu Turizmu no Kultura (MTK), Ministeriu Negosiu Estranjeiru no Cooperasaun (MNEC), Ministeriu Petrolium Rekursu Minerais (MPRM) no Sekretariu Estadu Promosaun Igualidade (SEPI). 

“Hau husu ba Ministeriu no sekretariu Estadu sira ne’e atu hadia jestaun informasaun kona ba servisu transparansia iha publiku, liu-liu jestaun orsamentu Estadu ba projeitu Ministeriais nian, tanba ne’e korpusaun boot ida,’ Diretur LABEH Gil da Silva deklara liu husi komperensia imprensa kinta (18/7) iha edifisiu LABEH Comoro, Dili. 

Nia hatutan, dadus tenderizasaun ne’ebe Governu iha, liu husi aprovizionamentu durante segundu trimestral (Abril-Junho 2013) hamutuk 101 ne’e ba kategoria governu konvida kompania nasional no internasional kompete ba tender no 23 ne’ebe kategoria kompania ne’ebe manan projeitu, husi dadus kategoria Governu konvida kompania. 

Tanba ne’e, LABEH konsidera pursentu 19 laiha transparansia iha informasaun, tanba laiha numeru referensia tender no kategoria kompanha ne’ebe manan pursentu 65 mak laiha transparansia, tanba governu la publika montante osan husi projeitu. 

 Razaun Diretur LABEH ne’e deklara Ministeriu 5 neebe refere laiha transparansia tanba, iha fulan Abril MS hasai tender maibe laiha numeru referensia tender inklui montante osan ba projeitu ne’ebe aprova ona ba aprovizionamentu hanesan projeitu ba limpeza no lavandaria iha HNGV no mos servisu limpeza no lavandaria iha hospital referal Baucau, Maliana, Maubisse, Oecusse no Suai inklui fornesementu equipamentu rega susuk no produs format, servisu travel agency, instalasaun makina autoclave ba HNGV no seluk tan. 

 Nune’e mos projeitu SEPI kona ba projeitu manutensaun ba kareta, motorizada no ATK inklui sira seluk, projeitu husi MTK konaba manutensau no kareta, RFQ kona ba manutensaun ba motorizadas inklui sira seluk, Huis MNEC projeitu kona ba prestasaun de servisu de limpeza concervacao e jardinagem, fornesementu material de eskritoriu, fornesementu konvustivel, prestasaun de servisu no seguransa re-tender, no MPRM kona ba manutensaun edifisiu ANP, ekipamentus IT inklui sira seluk. 

Ba kestaun ne’e hotu, LABEH sei lori dadus sira ne’e ba Komisaun Anti Korupsaun (KAK) atu bele halo investigasaun klean ba kestaun neebe refere. Entertantu, antes ne’e Organizasaun Naun Govermental Luta Hamutuk forma ekipa ida atu kontrola aprovizionamentu iha ministerial, tanba prosesu ne’e mak hamosu KKN. 

 “Ami tau hamutuk forsa hodi lao tuir maladrusira ne’ebe mosu iha prosesu aprovizionamentu, tanba durante ne’e ami detekta Ministeriu barak mak dobra iha prosesu ne’e,” hateten Mericio Akara antes ne’e.

,