“TVTL Labele Sai De’it Guarda Ministru”

.

Jornal Independente - Kuarta-feira, 17 Julhu 2013

Autoridade Lokal sira iha Distritu Bobonaro no Oekuse lamenta ho sistema kobertura Televizaun Timor-Leste (TVTL) tanba laiha inisiativa atu halo kobertura maibe hein deit membru governu sira ba vizita mak foin tuir. 

Xefe Suku Olsa, Distritu Bobonaro Antonio Santa Cruz konsidera TVTL halo diskriminasaun ba Distritu bobonaru tanba la fo sai informasaun ne’ebe akontese iha Distritu ne’eba.

Tuir nia dala ruma nia hirus jornalista TVTL sira bainhira membru Governu halao vizita ba Distritu sira sempre buka administrador atu asina no tau karimbu ba sira nia guia de marca hodi bele hetan osan perdiam.

 “Jornalista TVTL lori nia MOP mai hau atu asina, hau dehan imi mai liput se?. imi mai intervista se? imi ho boot sira deit,” lamenta xefe suku ne’e bainhira enkontru hamutuk ho ekipa Sekretariu Estadu Komunikasaun Sosial (SEKomS), Ministeriu Administrasaun Estatal (MAE) no rerejetante media sira iha enkontru ba monitorizasaun ba distribuisaun jornal, iha maliana foin lalais.

Nia dehan, ho atetude ne’e, dala ruma nia baruk atu haree programa TVTL kunadu iha notisia tama fali ba RTP.

 “Ita akompania tiha notisia TVTL kalan hotu tiha tama kedas ba Portugal….portugal hela deit, sira iha ne’eba mak laiha programa ka nusa? Nia kestiaona. Iha fatin hanesan, Administrador Distritu Bobonaro, Domingos Martins dehan, kada semana TVTL fo sai programa iha distritu sira hanesan Manufahi, Lautem, Baukau, Vikeke, no seluk tan maibe Bobonaro laiha.

 Nia hateten, dala barak nia parte fo konvite ba TVTL maibe la iha resposta pozitivu. Nia mos konsidera katak, TVTL halo kobertura iha Distritu Bobonaro hanesan mehi deit. Entertantu, Administrador Sub-Distritu Pante Makasar, Goncalo Eko lamenta tanba Oekusse ne’ebe sai nuudar Zona especial maibe la hetan kobertura husi TVTL. “Bainhira membru governu halo vizita mak TVTL foin ba,” dehan nia.

,