OJE 2013 MCIA Ejekuta Foin 13% no MS 26.3%“”

.

Foto, Luta Hamutuk

Jornal Nacional Diario - Kinta-feira, 11 Julhu 2013 

Orsamentu Jeral do Estadu (OJE) 2013 ne’ebe aloka ba Ministeriu Comerciu Industria no Ambiente (MCIA) ne’e foin ejekuta 13% deit, entertantu Ministeriu saude (MS) ejekuta seiduak to’o 30% (26.3%), tanba ne’e ONG naun Govermental Luta Hamutuk (LH) husu ba MS atu labele lohi an katak OJE ejekuta ona to’o 60%. 

 Direktur Ejekutivu Luta hamutuk (LH), Mericio Akara ba Jornalista sira kuarta (10/70 hateten katak, OJE 2013 ne’ebe governu uza atu ezekuta planu no programa tinan ida nia iha kada Ministeriu seidauk to’o 30%, tanba inkapasidade ezekusaun membru Governu sira. 

Mericio Akara hateten, Ministru saude Sergio Lobo laiha onestidade atu rekonese nia inkapasidade iha prosesu ezekusaun orsamentu 2013, tanba saida mak Ministru hateten lahanesan ho relatoriu Ministeriu Financas (MF) nian iha portal transparansia. 

Tuir loloos orsamentu ne’ebe aloka ba MS ne’ebe hamutuk miliaun U$6.056 ezekuta 30% ou bele liu, maibe realizade foin mak ezekuta U$ 16.3 (26.3%), rezultadu ne’e sai sasukat hodi hatete MS laiha kapasidade ezekuta OJE no presiza konsidera bainhira PM halo remodelasaun. 

“Buat ne’ebe Ministru koalia dehan nia ezekuta ona 60% ne’e lalos, sira foin ezekuta 26.3%, maske tau hotu komitmentu , obrigasoen foin to’o deit 46%,” afirma Diretur Luta hamutuk, Mericio Akara. 

 Nia hateten, maske MS dehan ezekusaun lao 64%, maibe dadus husi Ministeriu financas (MF) liu husi portal transparansia katak MS foin ezekuta 26.3%, dadus ne’e husi Governu la’os husi organizasaun Naun Govermental (ONG). 

“Kapasidade ezekusaun ne’e fraku, prioridade programa atu ezekuta mos sei marka pasu, laiha progresu,” dehan Akara. 

Nune’e mos, Ministeriu Comercio Industria no Ambiente (MCIA), Ministru nia reazen ba LH ladun hatudu matoridade nuudar lideransa no laiha kapasidade atu hatan publiku, maibe ho karakter emosional hasoru ema. “Ami responde katak, Ministru nia ezekusaun fraku hanesan Ministeriu saida, maibe ninia aat liu fali, tanba foin ezekuta 13%, ne’e at liu fali MS,” Akara lamenta. 

Nia dehan, Membru Governu dehan katak, labele gasta osan lalais tenke kuidadu, maibe tuir nia, lolos se la gasta lalais husik nia iha banku sentral ne’ebe lalika mai OJE, kuandu dehan kuidade iha konsetu uza didiak para labele iha korupsaun laos hasai tiha atu ba implementa rai fali ho razaun hasai osan neineik. 

“Bele tau kometmentu hamutuk mos seidauk to’o 30%, nebe diak liu sei iha fulan tolu ne’e bobok halo servisu hodi hadia, lalika defende an tun sa’e,” tenik Mericio. 

Nune’e, LH konkorda bainhira PM halo remodelasaun, Ministeriu hanesan ne’e presiza tetu didiak hodi haree, LH hamutuk haree laos kestaun gosta ka lae, maibe ninia kapasidade zekusaun, tanba ida ne’e mak ajuda povu. 

“Ami la hare ba politika A, B ou Independenti, ami interse mak ejekusaun orsamentu, tanba sa mak tinan klaran ona foin ezekuta osan hanesan ne’e,” tenik nia. 

Iha oportunidade ne’e, LH mos eziji ba Governu atu hadia estrada ne’ebe liga entre Maubisse no Hatubiliko, tanba iha area Turistiku no potensial ba seitor agrikultor. 

,