“ADN Konsidera Enjeneiru Timor Inkapasidade”

.

Jornal Independente - Sesta-feira, 19 Julhu 2013 

Ajensia Dezenvolvimentu Nasional (ADN) konsidera enjeneiru Timor-oan sira inkapasidade, tanba dala barak halo dezenu projeitu ruma kopia husi internet deit, la tuir sira nia kapasidade rasik. 

 Diretor ADN, Samuel Marcal hateten, tanba enjeneiru sira ne’e barak kopia husi internet, ne’e duni projeitu sira ne’e la tuir dezenu ne’ebe prepara husi kompania. 

“Ita halo uma ida uza fali dezenu halo moru nian, entaun projeitu ne’e rasik barak mak laiha kualdiade, tanba sala kedas husi dezenu,” dehan nia iha Hotel Timor soin lalais ne’e. 

Nia hatutan, halo deit bronjo mos dezenhu sira la loos, mota mai solur dala ida deit, projeitu sira ne’e lakon hotu kedas. 

“Hau lakohi iha tinan in ne’e akontese tan, tanba ne’e hau husu ba kompania sira tenke kontrola didiak, selae imi nia osan ami la selu no hau sei tun ba sobu hotu projeitu neebe mak laiha kualdiade,” hateten Samuel. 

Nune’e, nia mos husu ba Administrador Distritu sira atu kontrola didiak projeitu sira ne’e, karik laiha kualdiade sobu kedas, buat kiik sira ne’e labele hein deit husi nasional mak halo, maibe administrador mos iha poder atu halo.

.