Juiza Konsidera “Estadu Gasta Osan Saugate Ba DP”

.

Jornal Nacional Diario - Sesta-feira, 26 Julhu 2013 

Juiza Ana Paula Fonseca, konsidera estadu fakar osan saugate ba Defensor Publiku )DP) sira, tanba fo asistensia legal ba povu kbiit laek la efetivu. 

Ana Paula Fonseca dehan, iha realidade hatudu bei-beik katak, DP sira sempre abandona prosesu ba kazu krime ruma ne’ebe atu julga iha Tribunal. 

 Juiza Ana Paula Fonseca hato’o lamentasoens refere relasiona ba prosesu julgamentu ba kazu maok ida ne’ebe arguidu kumpri hela prizaun preventiva mak lori mai Tribunal atu julga, maibe, prezu ne’e tenke hein durante oras rua resin, tanba defensor ne’ebe atu fo asistensia legal ba arguidu la marka prezensa iha Tribunal. 

“Imi sosieade sivil sira mak observa deit, ida ne’e mak serviu sefensor publiku nian, Arguidu ohin kedas mai Juis ho Ministeriu Publiku preparadu ona maibe julgamentu la bele lao tanba defensor publiku iha serviso importante seluk,” dehan Juiz Ana Paula Fonseca iha Tribunal Distrital Dili, Kinta (25/7). 

Juiza ne’e haktuir, tuir lolos iha prosesu ba kazu ne’ebe atu halo julgamentu ne’e, arguidu hetan asistensia legal husi Defensora Laura Lay mais Tribunal hein la mosu, tenke hadia julgamentu ba loron 26 Setembru 2013. 

 Julgamentu refere tuir orariu sei preside husi Juiza Ana Paula Fonseca, Ministeriu Publiku reprezenta husi Prokuradora Ivonia Guteres no arguidu ba kazu naok ne’e hetan asistensia legal husi defensor Laura Lay. 

 Juiza Ana Paula mos informa ba sasin sira iha prosesu ne’e katak, julgamentu la bele lao, tanba ema ne’ebe defende arguidu la mai Tribunal ho razaun iha servisu ne’ebe importante, entaun juis desidi adia prosesu ne’e.

.