Retiru Loron 3 Membru Governu “Kada Ministeriu Sei Aprezenta Kbi’it No Frakeza Hodi Halo Remodelasaun”

.

Jornal Nacional Diario - Tersa-feira, 16 Julhu 2013 

Primeiru Ministru (PM) Kay Rala Xanana Gusmao informa katak, atu koalia konaba remodelasaun ne’e Governu sei realiza retiru durante loron tolu (3), iha fulan Agustu nia laran, atu Ministeriu ida-idak bele aprezenta sira nian frakeza no kbi’it, atu nune’e bele hatene saida mak durante ne’e ministeriu ne’e halo tiha ona. 

“Kona-ba remodelasaun ne’e, ami sei iha retiru ida iha loron tolu, iha loron 8-10 fulan Agustu, hodi ida-idak bele aprezenta ninia frakeza ne’ebe, nia halo saida ona buat sira ne’e hotu,” hateten Xefi Governu Kay Rala Xanana Gusmao ba Jornalista sira, hafoin loke enkontru ho ofesiais superior sira kona-ba sosiaizasaun Planu Estratejia no Annual NTL nian tinan 2014, Comoro, Dili, Segunda (15/7).

 Xanana hatutan katak, retiru ne’e haree Ministeriu ida ne’ebe mak funsiona no ida ne’ebe mak la funsiona durante ne’e. 

Xefi Governu ne’e haktuir katak, nia sei haka’as nafatin membru Governu sira inklui administrasaun publika hotu, atu sira tenki kopera hamuuk atu servi povu noa rai ida ne’e. 

 “Hau hakilar beibeik ba sira, i sira moa agora ne’e komesa hadia-an dadauk ona, retiru ne’e mak importante atu hatene Ministeriu ne’ebe mak halo no ida ne’ebe mak la halo,” katak Xanana. 

 Xanana mos rekonese katak, durante ne’e nia hakilar bei-beik ona membru Governu sira, maibe problema ida ne’e sei iha tan reuniaun ida ho administrasaun publika kona-ba lalaok servisu governu nian. 

Xanana akresenta katak, remodelasuan ne’e PM Xanana sei haree membru Governu sira nia servisu, tamba iha membru Governu balun mak fo laran duni ba servisu atu servi povu no rai ida ne’e, maibe balun mak malandru duni. 

 Xanana dehan, tinan ida ne’e komu tinan hamos uma laran, tanba ne’e nias ei tuir nafatin membru governu no diretur sira hotu. 

“Governu ida ne’e pertense ba hau hanesan xefe governu, buat ne’ebe mak sala tenki koalia ho hau,” tenik Xanana. 

.