“Kazu Membru PNTL Baku Deputadu PN Iha Faze Final”

.

Jornal Nacional Diario - Tersa-feira, 09 Julho 2013 

Prezidenti Komisaun B ne’ebe trata asuntu kona ba Negosiu Estranjeiru, Defeza no Seguransa Maria Lurdes Bessa informa, prosesu investigasaun kazu membru Polisia Nasional Timor-Leste (PNTL) husi Unidade Task Force baku deputadu Manuel Castro iha ona faze final. 

Deputada Maria Lurdes haktuir katak, ekipa V esforsu maka’as uza tempu ne’ebe SeKkretariu Estadu Seguransa (SES) husu iha PN ho diak, falta deit audensia ho deputadu Manuel Castro atu kompleta investigasaun ne’e no hato’o relatoriu no rekomendasaun ba iha Parlamentu. 

“Ita hein komisaun bele halo audensia ho deputadu Manuel Castro nune’e bele remata tuir tempu ne’ebe sira husu,” Maria Bessa hatete iha segunda (8/7). 

Entertantu, lamentasaun mai husi deputada JOsefa Pereira katak, fulan ida ona PN hasai rejolusaun ida atu investiga klean kazu oknum PNTL baku deputadu ne’ebe refere, maibe PN seidauk rna nia rejultadu. 

 “Hau lahatene rezolusaun ida ne’e implementa ka lae, nune’e mos PNTL fo atensaun ka lae ba ninia membru sira, ita lakohi ita ni instituisaun PNTL pratika fali hahalok premanismu, ita laos dehan uza forsa ba labarik sira, maibe uza tuir regras no lei,” deklara Deputada Josefa. 

Kazu ne’ebe refere akontese iha fulan kotuk liu ba bainhira deputadu Manuel Castro hare no atu ba sorin joven ida ne’ebe hetan baku husi membru PNTL husi unidade Task Force, maibe bainhira ba sorin deputadu ne’e hetan pankada no tolok husi oknum refere, nune’e PN hasai rezolusaun ida atu halo investigasaun klean ba kazu ne’e. 

.