“OJP-CNRT Apoiu PM Xanana Halo Remodelasaun”

.

Jornal Nacional Diario - Segunda-feira, 22 Julhu 2013 

Organizasaun Joventude Partidu Congresu Nacional Rekonstrusaun Timor (OJP-CNRT) apoiu 100% ba Primeiru Ministru (PM) Xanana Gusmao, ne’ebe mak sei desidi halo remodelasaun V Governu Konstitusional. 

Prezidenti OJP-CNRT, Jose Doutel Soares Costovo, Sabadu (20/7), iha Centro Convencoes Dili (CCD), esklarese ba jornalista sira katak, organizasaun Joventude ne’ebe halibur malu iha partidu CNRT fo nafatin apoiu 100% ba kualker desizaun ne’ebe mak PM Xanana atu foti hodi halo liu tan ba povu nia moris diak. 

 “Karik dalan remodelasaun ne’e mak solusaun PM Xanana hodi bele lori sai povu ne’e husi kiak no mukit, ami OJP-CNRT fo apoiu tomak ba desizaun PM Xanana nian ne’e,” afirma Jose Costovo. 

Remodelasaun ne’e mak sei afeita ba membru Partidu CNRT balun ne’ebe mak tuur iha Governu, Jose Costovo, reafirma katak, PM Xanana mak iha liu direitu prerogativu atu deside halo remodelasaun ka lae. 

“Hau la iha ideia ida lakohi mete buat ne’ebe PM Xanana atu halo, tamba remodelasaun governu ne’e, direitu prerogarivu PM Xanana nian,” hateten Jose Costovo. 

Iha parte seluk delegadu Distritu Baucau Antonio da Costa Derok Masin hatete, primeiru lugar nia fo apoi tomak ba desizaun politika ne’ebe xefi do Governu koalia said ala barak ona iha media kona-ba remodelasaun. 

“Ami fo apoiu tomak ne’e tanba ho razaun katak, Governu ne’ebe mak agora lidera husi maun Xanana Gusmao, tenke halo diak ba povu ida ne’e,” afirma Antonio da Costa Derok Masin. 

.