“PM Xanana Sei Hasai Membru PNTL Ativu Arte-Marsiais”

.

Jornal Independente - Tersa-feira, 16 Julhu 2013 

Primeiru Ministru (PM) Xanana Gusmao abertamente deklara katak, sei hasai membru Polisia Nasional Timor Leste (PNTL) sira ne’ebe sei envolve ativu iha grupu artemarsiais. 

 Nu’udar Ministru Defeza no Seguransa, xanana apela ba komandante PNTL atu buka no identifika membru sira ne’ebe envolve iha arte-marsiais hosi hasai husi PNTL tanba bele estraga imazen instituisaun nian. 

“Hau la tolera tan membru PNTL sira ne’ebe sei ativu iha arte-marsiais, diak liu ita lakon membru ida duke estraga instituisaun nia naran,” dehan PM Xanana, iha Akademia Polisia, Komoro, Dili, (15/7). 

Tuir nia, instituisuan ne’e atu lao ho imparsial hodi implementa lei no orden tenke evita nia membru sira envolve iha grupu arte-marsiais. “Ba membru PNTL sira hakarak serve estadu serve ho diak, se lakohi, entrega imi nia kilat ba serve deit artemarsiais,” dehan Xanana. 

Nune’e, Deklarasaun PM Xanana hetan apoiu maka’as husi Fundasaun Mahien (FM), nee duni, husu ba membru PNTL sira ne’ebe envolve iha artemarsiais tenke entrega uluk sira nia farda. 

Nune’e mos, maski Governu desidi ona hodi taka arte-marsiais, maibe FM fiar katak, sei la minimiza problema, tanba konflitu hanesan natureza hodi kontinua mosu nafatin. 

.