Mari Alkatiri: “Hau Mak PM Halo Tiha Ona Remodelasaun”

.

Jornal Nacional Diario - Segunda-feira, 15 Julhu 2013 

Sekretariu Jeral Partidu FRETILIN, Dr. Mari Alkatiri afirma katak, karik nia mak Primeiru Ministru (PM), remodelasaun ne’e akontese tiha ona ba membru Governu ne’ebe laiha kapasidade. 

 Tuir Alkatiri nia haree katak, PM Xanana ulun moras tanba deit hakilar membru Governu sira atu haka’as an hodi servi nasuan no povu ida ne’e. 

 “Ba hau, ha’u halo ona remodelasaun ne’e, kuandu hau mak Primeiru Ministru, hau la koalia, hau halo uluk,” afirma eis Primeiru Ministru iha Governu anterior Mari Alkatiri ba Jornalista, Sesta (12/7) iha Parlamentu Nasional (PN), hafoin halo refleksaun hamutuk kona ba politika jeral iha rai laran ho Governu. 

Alkatiri dehan, kuandu koalia uluk la halo remodelasaun, ida ne’e bele provoka fali ema sira ne’ebe atu mai investe iha rai laran ne’e, bele lakon konfiansa. 

 Alkatiri hatutan, FRETILIN kontenti ho nia pozisaun ida agora ne’e hodi garante stabilidade politika, maibe fiskalizasaun nafatin governu. Alkatiri haktuir, inves koalia deit maibe halo uluk remodelasaun mak foin informa, ida ne’e ema bele manan ho hametin tan konfiansa ba rai sira ne’ebe hakarak mai investe iha Timor. 

“Karik sira konvida ita atu tama ba Governu ita tenki haree, tanba kuandu ba hamutuk ne’e signifika katak, tama hotu iha governu ka hamutuk atu lori rai ne’e ba oin,” tenik Alkatiri. Alkatiri sublina, maske postura politika FRETILIN nia agora muda tiha ona, maibe la signifika katak FRETILIN atu tama hotu ba Governu ida ne’e. 

 “Tanba dala barak kuandu ita ida-idak iha nia uma ita diak malu, kuandu ita hotu tama hela hotu iha uma ida deit, ita bele ladiak malu,” katak Alkatiri. 

Alkatiri akresenta katak, Primeiru Ministru iha kondisaun tomak atu foti desizuan, tanba estabilidade politika laiha duvida ona, governu iha osan no kondisaun tomak atu foti deiszaun, tanba ne’e, tempu atu Primeiru Ministru foti desizaun ida hodi hadia sistema ne’e atu programa governasaun ne’e la’o ba oin. 

,