Orientasaun MS, Ambulansia Labele Tula Mate isin: “Komunidade Tristeza No Hulan Mate Isin To’o Uma”

.

Notisia Husi TVTL - Tersa-Kalan, 10 Julhu 2013 

Populasaun Suai Loro no Kamnasa hato’o keixa ba Prezidenti da Republika kona ba falta ambulansia hodi tula ema mate iha Ospital Referal Covalima. 

Populasaun sira hato’o keixa ne’e ba prezidenti da Republika, wainhira hasoru malu ho vitima dezastra naturais iha Suku Suai Loro Distritu Covalima foin lalais ne’e. Sira informa katak, wainhira mate iha ospital referal Suai familia leva deit to’o iha uma, tamba laiha kareta. 

“Foin lalais liu loron tolu liu ba, ita nia maun ida ke mate iha ospital Distritu Covalima ami hulan deit husi ospital to’o iha fatin, tamba ami husu ambulansia maibe dehan aat,” dehan Komunidade. 

 Hata’an ba kestaun ne’e, Diretor Ospital Referal Suai Elizio Gusmao rekonese kestaun ida ne’e tamba sira laiha duni kareta atu tula mate. 

“Loron hira liu ba ema hulan deit kalan husi ospital sai ba liur tamba ami iha kareta ida de’it, ami mos hetan autorizasaun husi leten (ME) katak, ambulansia emerjensia so tula de’it ema moras la’os atu tula ema mate,” dehan Diretor Ospital. 

Mate isin ne’ebe hulan husi ospital to’o uma maibe husi Suku Suai Loro no tabolo Duku kabau. Wainhira TVTL konfirma liu husi telefonika motorista ba karro funeral Suai hateten, kareta aat tamba ne’e susar atu atende. 

.