Konstrusaun Rezidensia Ministra Finana “ADN La Hatene Nia Prosesu”

.

Jornal Nacional Diario - Kuarta-feira, 24 Julhu 2013 

Ajensia Dezenvolvimentu Nasional (ADN), fase liman hasoru konstrusaun ba rezidensia Ministra Finansa Emilia Pires, iha area Farol, Suku Motael, ne’ebe entidades balun konsidera luxu, tanba ADN la hatene prosesu konstrusaun ne’e hahu. Samuel Marcal afirma katak, ADN La hatene prosesu hahu konstrusaun ne’e, tanba konstrusaun ne’e lao tiha ona maka ADN ne’e forma estabelese ikus. 

“Konstrusaun ne’e hau la dun apar, tanba prosesu tomak ba projeituida ne’e hamriik husi Ministeriu Financas, atu single source ou tenderizasaun hau la dun apar,” sublina Samuel marcal ba Jornalista sira foin lalais ne’e, iha seminariu Dare, Dili. Samuel Marcal akresenta katak, maske ADN hamriik ikus, maibe lalaok konstrusaun ne’e Ministru Finansa kontinua informa mai AND. 

 “Rezidensia Ministeriu Finansa ne’e halo ho kustu ne’ebe ki’ik, tuir ita iha Timor rezidensia ne’e ita hanoin dehan uma ne’e luxu ona, maibe iha fatin seluk uma hanesan ne’e seidauk luxu,” Samuel Marcal dehan. Tanba ne’e Samuel dehan,” ema labele hanoin katak, ho rezidensia ida ne’e mak atu foti ona nasaun Timor Leste, ne’e seidauk kategoria ba luxu. Samuel Marcal fundamenta tan katak, maske Timor-Leste nasaun foun ne’ebe foin ukun an tinan sanulu resin, maibe presiza mos hatudu ba nasaun sleuk katak, Timor Leste mos komesa hakat ona ba oin. 

“Ita nia nain ulun sira mos presiza hela iha uma ne’ebe diak, para it abele hatudu ba ema seluk katak, ita mos la kiak liu,” dehan Samuel Marcal. Samuel Marcal haklaken katak, tuir ADN nia hatene, total orsamentu ba konstrusaun rezidensia Ministra Finansa ne’e, US$ Miliaun ida resin. 

Kona-ba se-se mak atu hela iha rezidensia ne’e, Samuel Marcal argumenta katak, ADN seidauk hatene klaru, tanba seidauk hetan informasaun. Entertantu antes ne’e, informasaun ne’ebe mak espalla ona iha publiku hateten katak, uma ne’e atu entrega ba Prezidenti da Republika (PR) Taur Matan Ruak, maibe PR rezeita simu uma ne’e, tanba konsidera uma ne’e iha kedas fatin publiku. Nune’e, to’o notisia ne’e fo sai seidauk hetan konfirmasaun husi Prezidenti Republika Taur Matan Ruak.

.