“Presu Nesesidade Baziku Komesa Sa’e”

.

Jornal Independente - Kinta-feira, 25 Julhu 2013 

Dezde insisiu fulan Jullu 2013 nian laran presu nesesidade baziku komesa sa’e, folin sasan hirak ne’e entre prosentu lima (5%) to’o porsentu sanolu (10%). 

Relasiona ho mudansa hirak ne’e, konsumidor sira eziji ba governu atu implementa lalais tabela presu, ne’ebe antes ne’e governu promete ona. Jose da Cruz (37) hateten, Ministeriu Komersiu Industria no Ambiente (MKIA) koalia beibeik ona katak sei hatun presu sasan nesesidade baziku iha merkadu, maibe realidade folin ne’e kontinua sa’e tan, no promesas hirak ne’e hela ho graganta deit. 

 “Ami la presiza Ministru sira mai koalia rebo-reb, importante ami hakarak haree sira nia asaun hodi hatun presu sasan,” tenik nia iha Audian, Dili (24/7). Deolindo da Silva (47), hamutuk ho nia familia nain haat dala barak sosa foos lata iha merkadu atu bele sustenta ba semana ida nian, tanba nia rasik laiha rendimentu permanente atu sosa foos saka. 

“Hau dala ruma sosa lata U$2 nian iha merkadu atu bele han hamutuk ho familia ba semana ida nian,” tenik nia iha Merkadu hali-Laran ho tristeza. 

Desizaun Governu atu hatun presu nesesidade baziku konsidera tarde , tanba promesa hirak ne’e halo dezde tinan fiskal 2013, maibe fulan hitu ona seidauk iha realizasaun. 

.