“Grupu Hipnoteza Mosu Ona Iha TL”

.

Jornal Independente - Kuarta-feira, 10 Julhu 2013 

Vitima Mario da C. Araujo (24) informa ba INDEPENDENTE katak, nia osan ema deskoinesidu naok hafoin halo asaun hipnoteza. 

Grupu ne’e nain haat (4) uza kareta pazero ho reben metan, naok nia osan hamutuk U$300 Dolar Amerika, iha tersa (9/7). 

Vitima ne’ebe nia hela fatin iha Manleuana hateten katak, wainhira nia lao hela atu ba kompras sasan kios nia iha Audian derepenti deit iha kareta Pazero reben metan ida para iha nia sorin no ema ida tuun husi kareta ne’e hodi halo asaun hipnoteza ba nia. 

“Hau lori osan U$300 atu ba kompras sasan kios nian iha loja Star King, maibe bainhira hau lao hela ema deskonesidu ne’e ho pajero reben metan mai para no tuun mai hipnoteza tiha hau no foti hau nia osan ba hotu kedas,” hateten Mario. 

Nia hatutan, depois nia hetan hipnoteza no bilan tiha ema ne’e bolu nia sa’e ba kareta no ba hatuun hela nia iha parte Surik Mas nian, hafoin nia sadar fila-fali iha minutu 20 nia laran. 

 Hafoin sadar, nia iha tiha ona Surik Mas no nia osan mos laiha hotu tiha ona, maibe kareta ne’e halai liu tiha ona. Nia dehan, modelu ema deskonesidu ne’e isin mutin, fuuk boot, badak oan no hatais kamizola metan ida, no iha kareta laran iha mos mane nain tolu seluk. 

Vitima ne’e senti triste no trauma tebes tanba TL hanesan nasaun ida neebe mak foin ukun an maibe iha ona ema naok ten hanesan ne’e. 

 Nia dehan, se karik kazu ne’e mak la buka tuir no kaptura lalais mak sei iha tan vitima barak, no bele mos ema ne’e naok labarik sira. 

Nia apela ba parte seguransa PNTL atu bele identifika no kaptura tiha suspeitu ne’e atu nune’e problema ida hanesan ne’e labele mosu tan iha rai ida ne’e. 

.