Jornal Nacional Diario - Kuarta-feira, 24 Julhu 2013
Arguidu Sabino dos Santos Soares, oras ne’e, tenke haksimuk iha Otel
Becora durante tinan 16, tanba prova komete kazu insestu (Halo
violasaun seksual) hasoru nia oan intiada (anak tiri) ne’ebe mak foin
ho idade tinan 15.
Desizaun primeiru instansia ne’e fo sai husi juiz Jose Maria de
Araujo, Segunda (22/7), bazeia ba artigu 172 no 173 kodigu penal sobre
krime violasaun seksual hasoru menor.
Prova mos katak, arguidu hanesan padrastu ne’ebe kaben ho vitima nia
inan, ne’ebe iha loron 3 Dezembru 2011, vitima nia inan ba hanorin
eskola no vitima halimar hela ho arguidu nia oan nain 4 iha uma, maka
arguidu aproveita tempu dada vitima ba kuartu laran xave metin
odamatan amiasa vitima no obriga tenki hasai hotu roupa iha isin lolon
no atoba iha kama laran.
Bainhira vitima tauk hodi toba iha kama laran no arguidu kolu nia
kalsa hodi halo violasaun seksual hasoru vitima, hahalok imoral ne’e
mos arguidu halo hasoru vitima iha lorn 14 Dezembru 2011 hodi halo
vitima hetan gravida no kous bebe mane oan ida.
Altura vitima isin rua arguidu mos ameasa vitima atu labele hatete sai
ba nia kabene, ba hahalok ne’ebe nia halo ba vitima, entaun bainhira
besik partus mak vitima konfesa ba nia inan katak nia aman padrastu
mak fo oan ba nia.
Ho hahalok ne’e Ministeriu Publiku (MP) akuza arguidu ho krime rua,
Violensia domestika ho violensia seksual agravadu.
Arguidu mos iha Tribunal deklara faktus tomak katak akuzasaun ne’ebe
MP akuza ba nia ne’e los hotu, no nudar aman padrastu nia arepende ba
hahalok ne’ebe akontese liu ona, nune’e nia kontinua fo
responsablidade ba labarik mane ne’ebe vitima kous hela.
Ho prova hirak ne’e, Tribunal aplika pena ba krime rua ho kada krime
prizaun tinan 9, maibe, tetu ho hahalok arguidu nia kontribui ho
justisa, mak hasai ho pena uniku ba krime rua ne’e hamutuk tinan 16
hela iha prizaun becora.
Desizaun primeiru instansia ba kazu ne’e prezide husi Juiz Jose Maria
de Araujo, PM reprezenta husi Prokuradora Ivonia Guterres no Arguidu
hetan asistensia legal husi defensora Laura Lay.
.
Sem comentários:
Enviar um comentário
Nota: só um membro deste blogue pode publicar um comentário.