“MP Husu Tribunal Kondena Borlaco”

.

Jornal Nacional Diario - Kuarta-feira, 10 Julhu 2013 

Ministeriu Publiku (MP) reprezenta husi Prokuradora internasional, Gloria Alves, husu ba Tribunal atu kondena arguidu Francisco da Csota Soares “Borlaco” atual Sekretariadu Estadu Fortalesementu Institusional (SEFI) ho pena tinan 4 komarka. 

MP foti kestaun ne’e kaer ba faktus ne’ebe hatudu duni arguidu Francisco Borlaco komete krime abuzu de poder ho krime partisipasaun ekonomia de negosiu. MP mos konsidera arguido Mariano Malik director kompania Tiara Lda, komete krime fraudia fiskal no nune’e husu ba Tribunal atu aplika metade de pena husi krime fraudia fiskal. 

Liu husi alegasaun MP nian iha Tribunal Distrital Dili (TDD), tersa (9/7), MP konsidera prosesu tenderizasaun ne’e hamosu iregularidade barak, tanba kompania Tiara Lda, la’os halo importasaun ba kareta, maibe parte aprovizionamentu hili kompania Tiara ne’e mak sai vensedor. 

 Defensor Publiku ne’ebe reprezenta husi Cancio Xavier no Olga Barreto husu ba Tribunal atu absolve arguidu nain rua, tanba arguidu Francisco la komete krime abuzu de poder ne’ebe mak dehan hanesan funsionariu estadu nian uza sala nia poder, tanba arguidu Francisco asina deit saida mak parte ekipa evaluasaun halo ona. 

Nune’e, Arguido Mariano mos tuir deit konkursu, no parte ekipa evaluasaun mak halo verifikasaun hodi desidi nia kompania mak sai vensedor, tanba ne’e Cancio husu Tribunal atu absolve. 

Antes ne’e, MP kauza arguidu Framcisco Borlaco ho krime abuzu de poder no fraudia fiskal, tanba iha loron 29 Agusto 2009, arguidu Francisco Borlaco aprova karta hodi sosa kareta kamioneta tolu ba Ministeriu Edukasaun atu fasilita programa merenda eskolar. 

 Aprovasaun ne’e halo bazeia ba proposta husi Ministeriu Edukasaun Diresaun Nasional Servisu Aprovizionamentu Ministeriu Financas, hodi husu osan ho valor U$90.000,00 atu sosa kareta kaminiota tolu ba ministeriu Edukasaun. 

Husi valor osamentu ne’e, Ministeriu Edukasaun desidi atu sosa kareta kaminiota ida ho montante U$29.000,00 resin, maibe rezultadu hatudu oinseluk, katak ‘Invoice’ ne’ebe kompania Sinarias Lda haruka ba Ministeriu Edukasaun ho montante RP. 150.000.000/Kamioneta ne’ebe simplifika ba osan Dolar provolta U$16,304,00,00. Signifika kareta folin ne’ebe Ministeriu Edukasaun sosa la tuir montante iha prosesu tender. 

 Ho prosesu tender no ezekusaun projeitu kareta tolu ba ME ne’e nia rejultadu mak MP akuza arguidu Francisco Borlaco hanesan autor material ba krime abuzu de poder no arguidu Mariano Malik nudar autor ba krime fraudia fiskal ne’ebe previstu iha artigu 314 kodigu prosesu penal Timor Leste. 

Iha julgamentu ne’e, prezidi husi juiz koletivu kompostu husi Jacinta Correia, Antonio Helder do carmo no mos Julio Gantes, arguido Francisco Borlaco no Mariano Malik hetan asistensia legal husi defensor publiku Cancio Xavier no mos Olga Barreto, kazu ne’e adia fali ba loron 25 fulan Julhu hodi rona leitura akordaun. Iha julgamentu ne’e hetan partisipasaun husi membru Partidu Demokratiku (PD) no mos eis deputada Teresa Carvalho, Gertudis Moniz inklui Linadro Isac. 

.