Abandona Trabaladores; “ADN Kesar Kompania Atramor Ba Xanana”

.

Jornal Nacional Diario - Kinta-feira, 18 Julhu 2013 

Diretur Ajesnia Dezenvolvimentu Nasional (ADN), Samuel Marcal, kesar kompania Atramor ne’ebe abandona hela direitu trabaladores, ba Primeiru Ministru (M) Kay Rala Xanana Gusmao hafoin hala’o inspeksaun ba konstrusaun edifisiu Comicao Nacional Eleisoens (CNE), iha Kolmera Dili. 

“Ami mai iha ne’e, trabaladores atu han deit mos susar, ida ne’e tanba kontrator loro-loron la ba iha fatin konstrusaun hodi tau matan ba trabaladores,” dehan Samuel Marcal ba Jornalista sira, iha edifisiu CNE Caicoli, Dili, Tersa (16/7). 

Samuel Mendonca akresenta katak, trabaladores balun tenki halai ses husi servisu, tanba la hetan atensaun husi kontrator. 

 “Agora trabalador sira halai hotu tanba kontrator la tau atensaun ba sira, se kontrator mak la iha fatin servisu hanesan ne’e, oinsa mak servisu atu bele lao, tanba ne’e mak PM nia oin hau husu atu kontrator haka’as an atu servisu, se lae ita halo buat hotu la lao,” Samuel Marcal deklara. 

Samuel Marcal fundamenta tan katak, kuandu hahalok kompania Atramor kontinua hanesan ne’e, governu hapara hodi buka fali kontrator foun atu bele kontinua konstrusaun ne’e. 

Hatan ba kestaun ne’e, Primeiru Ministru Kay rala Xanana Gusmao husu ba And no MOP buka atu rezolve problema ida ne’e. 

PM Xanana dehan, nia konese emprezariu Timoroan hotu, emprezariu sira ne’e komesa funan ba beibeik, maske nia rins no isin lolon ne’e atu katuas no ferik dadauk ona maibe funan nafatin, ida ne’e mak problema sira iha ne’e. “Husi KAFI ami sei tu’ur atu haree, katak saida mak atu selu tenki selu ona, hodi fo garantia ba imi atu bele halao obra ida ne’e,” Xanana hgaktuir. 

Xefi Governu ne’e husu ba tekniku kompania Atramor ati tu’ur hamutuk hodi deskute Schedule ba obra ne’e atu halo oinsa. 

.