“Fundu Infraestrutura Halo Governu Ulun Moras”

.

Jornal Nacional Diario - Kuarta-feira, 07 Agusto 2013 

Direktur Agensia Dezenvolvimentu Nasional (ADN), Samuel Marcal afirma katak, projeitu husi fundu infraestrutura mak to’o oras ne’e halo Governu ulun moras. 

“Tuir ami nia haree iha projeitu hat husi fundu infraestrutura mak dala ruma halo ami nia ulun fatuk moras, ida mak Edifisiu CNE, edifisiu Justica, ida mak Komisaun Funsaun Publiku, no ida mak Hospital referal Baucau,” dehan Direktur ADN Samuel Marcal ba Jornalista Tersa (6/8) iha palacio do Governu. 

Samuel Marcal haktuir, konstruksaun ba edifisiu hat ne’e mak atrazu teb-tebes, tanba ne’e Governu liu husi ADN sempre bolu kompania sira ne’ebe kaer projeitu ne’e hodi halo konsultasaun, hodi fo solusaun ba sira oinsa mak atu rezolve problema sira ne’e. 

Nia dehan, edifisiu CNE ne’e kumplikadu oituan, tanba Governu prepara hotu kontratu, Kompania Atramor Succeso Ltd, hatama ninia pedidu ba Governu hodi hateten katak halo amandament, nune’e Governu prepara tiha amandamentu hein to’o fulan, kompania nain Raul Lemos la mosu atu asina. 

“Ita bolu Diretor kompania ne’e, Diretur iha hela deit liur, nunka hakarak mai atu rezolve,” Sublina Samuel Marcal ho Triste. Seluk fali Samuel hateten, Edifisiu Komisaun Funsaun Publiku nian mos atraza, maibe governu fo xamada atensaun Diretur Kompania mai kedas hodi koalia hamutuk kona-ba problema ne’ebe nia infrenta. 

“Ami ADN loro-loron Kompania sira ami bolu hotu, ba sira ne’ebe mak halo laiha kualidade, hanesan ba kaer projeitu PDD, balun kaer projeitu PDID balu kaer PDL, balun kaer irigasaun, bronzo no buat hotu, ami bolu sira para ami halo revizaun ba dezenhu, kustu no buat seluk tan,” Katak Samurl Marcal. 

Samuel Marcal hatutan, agora dadaun kompania sira ne’e kontinua hala’o hela sira nia serviso, maibe problema sira nian ne’e mak problema finanseiru, no problema manajementu. 

,