Membru Governu Bosok Povu, “Ejekusaun OGE 2013 La Reflekta Buat Ida”

.

Jornal Nacional Diario - Tersa-feira, 06 Agusto 2013 

Sosieade Sivil konsidera rezultadu Ezekusaun Orsamentu Jeral do Estadu (OJE) 2013 la reflekta buat ida, tanba Ministru no Sekretariu Estadu balun ninia ejekusaun OJE ne’e la dauk atinji Porsentu 30, maibe membru Governu balun kontinua bosok povu katak, ejekusaun porsentu 40 ba leten ona. 

“Dala barak sira lori ida ne’e bosok publiku katak, sira ejekuta duni, maibe povu bele analiza ho ejekusaun ne’ebe bo’ot realidade laiha, ejekusaun OJE seidauk to’o pursentu 30, sira (Ministru no Sekretariu Estadu) dehan sira ejekuta ona pursentu 45 no balun pursentu pursentu 50, pursentu ne’e sira soma hamutuk komitmentu (planu ne’ebe atu ejekuta) no actual osan ne’ebe sai ona, maibe tuir lolos sira mak ida ejekuta ona ne’e,” Diretur Ejekutivu Luta Hamutuk, Mericio Akara deklara kestaun ne’e ba JNDiario, segunda (5/8) iha nia kna’ar fatin Farol, Dili. 

Tanba nia haktuir, projeitu barak mak abandona, laiha kontrolu, supervizaun, maibe Sekretariu Estado no Ministru sira lao tun sae hodi halo inagurasaun, obra ne’ebe sira inagura la to’o fulan 6 aat fali ona, tanba laiha kualdiade efeitu ba povu nia osan. 

Nune’e, mos nia parte lamenta kondisaun infraestrutura iha teritoriu Timor-Leste tomak hanesan infraestrutura, saude, edukasaun no seluk tan ne’ebe kontinua sai preokupasaun no lamentasoens husi komunidades no entidades sira seluk. 

Tanba ne’e, Akara hateten, maske sira (Ministru Sekretariu Estado) dehan OJE 2013 ejekuta to’o tiha ona 45%, maibe infra-estrutura baziku ne’ebe ita haree ho matan ne’e minimu liu, entaun signifika Ministru no Sekretariu Estado sira ne’e hanoin tur iha AC deit duke halo planu hodi tun diretamente ba baze. 

Nune’e mos Diretur Interinu Sosiasaun HAK Manuel Monteiro hateten, Governu tenke fo atensaun masimu direitu povu nian ba moris diak, liu husi OJE ne’ebe mak aprova atu halao dezenvolvimentu hodi povu bele sente benesifiu orsamentu ne’e rasik. 

Haklaken nia, agora dadaun komunidade presiza mak dezenvolvimentu ne’ebe la’o ho transparensia no akuntabilidade, laos ida hariku grupo balun deit hodi halo grupu seluk terus, sofre no sai vitima.

.