“Miss TL 2013, MTK Seidauk Rende”

.

Jornal Independente - Tersa-feira, 13 Agusto 2013 

Ministru Turizmu no Kultura (MTK) sei kontinua realiza programa Miss Timor-Leste 2013 maske komunidade barak no sosieade sivil sira kontra programa ne’e. 

 Iha fulan hirak liu ba, hafoin planu MTK ne’e hetan kritika maka’as husi publiku, dadauk ne’e Ministru Francisco Kalbuadi Lay entrega ona programa Miss Timor ba Sekretariu Estadu Arte no Kultura atu implementa. 

Tuir planu programa kontraversial ne’e sei implementa iha tempu besik iha fulan ida ne’e nia laran. 

Juventude ida iha Kuluhun, Jose Maria (22) dehan, karik MTK hakarak fakar osan, diak liu fakar ba fatin turistiku sira ne’ebe aat duke fakara ba programa ne’ebe fo deit benefisiu ba ema ida-rua. 

 Tuir nia, realdiade moos hela iha oin, fatin turistiku barak mak aat, diak liu osan ne’ebe iha fakara ba iha ne’eba deit duke ba Miss Timor-Leste. Iha fatin seluk, Estudante UNDIL Maria de Jesus (24) dehan la satisfas ho programa Miss Timor-Leste, tanba tuir nia, bainhira Miss Timor-leste iha entaun fatin turizmu mos tenki diak hodi nune’e bele lao balansu. 

Tan ne’e, Maria husu ba MTK atu tetu no hanoin didiak fila fali planu ne’e molok realiza, nune’e labele iha tan duvida husi povu. Nune’e, Jornalista ne’e tenta atu intervista kestaun ne’e ho Ministru kalbuadi maibe nia informa katak, programa ne’e agora iha Sekretariu Estadu Arte no Kultura nia liman. 

Bainhira konfirma ho Sekretariu estadu Isabel Ximenes, nia lakohi fo komentariu sein razaun ruma. “Hau lakohi fo komentariu ne’e gaa???, Mak ne’e deit ona,” dehan Isabel. 

.