FRETILIN Hakarak Fo Liberdade Ba Jornalista “Nelio: Labele Preokupa Lei Imprensa”

.

Jornal Nacional Diario - Kuarta-feira, 14 Agusto 2013 

Bancada Partido FRETILIN Sei haree didiak lei komunikasaun Sosial atu nune’e lei ne’e bele fo importansia no fo livre ba Jornalista sira hodi halo sira nia knaar ho diak. 

“Desde primsipiu ami Bancada opozisaun hakarak tamba komunikasaun social importante liu hodi fahe informasaun no rekoila informasaun, tamba liu husi informasaun povu iha baze mos bele akompania informasaun kona ba rai laran, liu-liu ba ezekusaun OJE dala ruma povu balun la hatene saida mak akontese iha nasional ba to’o iha baze tanba laiha komunikasaun liu husi media imprensa ho eletronika,” hateten Deputada Ana Ribeiro husi Bancada FRETILIN ba JNDiario iha PN tersa (13/8). 

 Propsota lei komunikasaun social ne’e Konsellu Ministru aprova iha Tersa feira semana kotuk ne’ebe hein deit atu submete ba Parlamento nasional hodi deskute no aprova. 

 Deputada ne’e dehan, as vezes governu hakarak fasilita ou regula deit ba governu maibe sira hanesan opozisaun nia hakarak tenki fo liberdade ba Jornalista hodi rekoila informasaun ba ubliku, liu-liu ba povu sira ne’ebe mak hela iha baze no area rural. 

“Ami nia hakarak mak ne’e, tenki fo livre (bebas) ba Jornalista sira hodi nune’e rekoilha no fahe informasaun ba publiku sira tenki ba to’o iha baze, tanba sira koalia tuir realidade ne’ebe governu la bele fo presaun ba jornalista sira para jornalista sir abele espresa povu nia hanoin no indentidade sira nia hanoin kona ba rejultadu ejekusaun orsamentu,” deputada FRETILIN ne’e husu. 

Iha parte seluk, Sekretariu Estadu Komunikasaun Sosial (SEKoms), Nelio Izak Sarmento husu ba media tomak iha Timor Leste (TL) atu labele preokupa ho lei Komunikasaun social ne’ebe agora dadauk nee aprova ona iha Konsellu Ministru, tanba lei ne’e mosu atu importansia ba kna’ar Jornalizmu nian, laos atu impede profisaun Jornalista sira nian. 

Nelio Izak hatutan katak, lei Imprensa aprova ona iha Konsellu Ministru hodi ejiji responsablidade problema desputa entre estadu, sidadaun ho media, atu nune’e instituisaun ida-idak lao tuir nia kna’ar ho justu no ho loloos. 

 Nunee mos, relasiona ho asosiasaun media sira preokupa ho lei imprensa ne’ebe SEKoms aprezenta ba Konsellu Ministru la involve tema Five ne’ebe uluk tau hanoin hamutuk hodi formula lei imprensa ne’e, Nelio Izac esplika diskusaun iha Konsellu Ministru la involve ema husi liur tanba ne’e kompetensia Governu nian.

.