“Rejultadu Investigasaun Kilat PM2-V1 Iha Ona PN”

.

Jornal Independente - Segunda-feira, 12 Agusto 2013

Rejultadu investigasaun ba kazu hatama kilat PM2-V1 husi kompania PT. Pindad Indonesia mai TL intrega ona ba iha Komisaun B (Trata ba Asuntu Defeza no Seguransa) iha Parlamentu Nasional (PN).

Sekretariu Estadu Seguransa (SES) Francisco Guterres hateten, prosesu investigasaun remata ona iha fulna Jullu liu ba no nia rejultadu komisaun eventual ne’ebe mak nia rasik forma ne’e intrega ona ba komisaun B PN.

 “Hau haruka ona karta ida ba komisaun B para hahu ona bolu membru ekipa verifikasaun ne’e para komesa ona hala’o servisu (reviu rejultadu investigasaun,” hateten Francisco ba INDEPENDENTE iha Dare sesta (09/8).

 Nia rekonese katak, kilat ne’e Governu mak hola duni tanba atu sosa kilat ne’e kompetensia governu nian, komunidade no Komisaun B iha Parlamentu Nasional mak kestiaona prosesu hatama kilat ne’e tanba konsellu Ministru seidauk aprova kilata ne’e hatama ona mai Timor Leste.

 “Ami mos haree ona husi parte legal ida katak, governu iha altura ne’eba iha hela kontratu ho kompania PT. Pindap ne’e tanba ne’e kompania refere bele hatama kilat maibe temke liu husi prosedimentu,” hateten Francisco.

Governu sosa kilat hamutuk 77 ba Polisia Nasional Timor Leste (PNTL), oras ne’e, Polisia Unidade Polisia Fronteira (UPF) utiliz aona kilat ne’e.

Tuir Guterres, kilat PM2-V1 ne’e nia kualidade diak duni tanba ne’e mak PNTL husi Unidade espesial (UEP) uza ona, kompania hatama kilat ne’e mai mos iha kontratu legal.

Antes ne’e, iha sosieade sivil balun no komunidade kestiaona kona ba prosesu sosa kilat ne’e tanba tuir sira laiha transparansia no entre SES ho komandante Jeral PNTL laiha koperasaun diak iha prosesu sosa kilat ne’e, tuir sosieade sivil katak, atu sosa kilat ne’e laos kompetensia Komandante jeral nia maibe governu nian.

.