“Lere Preokupa Oecusse Sei Dada Bandeira Merah Putih”

.

Jornal Nacional Diario - Segunda-feira, 19 Agusto 2013

Xefi Estado Maior General das FALINTIL-Forca Defesa Timor-Leste (F-FDTL), Maijor Jeneral, Lere Anan Timur, preokupa maka’as tanba sidadaun Timor-oan sira iha Distritu oecusse sei kontinua nafatin hasa’e Bandeira Merah Putih ema Indonesia nian.

 “Ita nia maluk sira Oecusse neebe sei dada nafatin Bandeira Merah Putih maibe ita nia ukun nain sira nunka besik ba atu hodi haree,” dehan Lere wainhira sai orador iha seminariu Cruz Joven, iha salaun Paroquia Ave Maria, Suai, Sabadu (17/08).

Ho preokupasuan hirak ne’e, Lere husu ba ukun nain sira tenki konsiente ho kestaun sira ne’e para sensibiliza, sosializa ba populasaun sira atu bele hatene katak, Timor-Leste iha rasik ona bandeira no Hino Nasional.

Nia mos husu ba Eskola sira hotu iha parte Oecusse nian atu oinsa fo edukasaun kona-ba Historia Timor-Leste nian, atu nune’e estudante sira bele hatene saida mak akontese iha nia rai rasik iha tempu uluk, agora no futuru.

“Ida ne’e ita rasik mak atu hatun ita nia dignidade iha nasuan ida ne’e, tanba ita hamrik mesak ona lakohi atu hasa’e ita nia bandeira maibe hakarak sei kontinua nafatin atu hasa’e ema seluk nia bandeira,” Triste Lere.

Maijen Lere mos iha okaziaun ne’e hateten, ba juventude sira atu labele mete arte marsiais tanba governu hasai ona rezolusaun hodi taka totalmente.

 “Ba hau rasik sei la preokupa ho arte marsisiais, ita tenke kumpriende saida maka estadu, ema la kumriende mak atu sukat ho estadu, se maromak laiha karik estadu mak sei boot liu,” dehan Lere.

Nia mos sublinha katak, nudar Joven labele halimar ho estadu hodi halo buat hotu tuir ida-idak nia hakarak deit, maibe tenki tuir Estadu nia hakarak.

 “Demokrasia mos dala barak ita uza sei sala, hanesan buat hahan foun ida ba ita, bainhira ita han sala ona mak ita sei han kabun moras, hahalok demokrasia mos hanesan ne’e, arte marsiais mos hanesan ne’e,” tenik Lere.

.