Ro Ambulansia MS Para Deit Iha Dili “Komunidade Atauro Triste Boot”

.

Jornal Nacional Diario - Kuarta-feira, 21 Agusto 2013 

Ro Ambulansia Ministeriu Saude ne’ebe oferese ba Centru saude Sub Distrito Atauro, hodi fasilita tula moras emerjensia mai Dili, maibe to’o agora para deit iha Dili. 

Administrador Sub Distrito Atauro, Manecas da Conceicao Soares, preoupa tebes ro MS ne’e nia paradeiru, tanba nunka mosu iha Atauro atu bele atende moras emerjensia sira, tuir proposta ne’ebe mak komunidade Atauro hato’o ba Governu iha mandati IV Governu Konstitusional nian. 

 “Durante ne’e ami hetan ajuda husi Policia Nacional Timor Leste (PNTL), liu husi Policia Maritima, hodi fasilita ro patrolha Policia Maritima ninian hodi tula moras emerjensia husi Atauro ba Dili,” informa Manecas Soares ba Jornal Nacional Diario iha Atauro, Sabadu (17/8). 

 Husi sorin seluk, Director saude Distritu Dili, Agustinha da Costa, mos hato’o nia laran sente triste ba situasaun ida ne’e, basa, ro ambulansia ne’ebe intrega husi MS iha loron 30 Julhu 2013, atu atende pasiente emerjensia iha Atauro lori mai HNGV, maibe derepenti deit avaria tiha ona no para permanente deit iha tasi ibun Licidere, Dili. Director Agustina ne’e hateten, Ro Ambulansia ne’e sidauk tula pasiente dala ida maibe foin koko deit husi Porto Dili ba Atauro no fila husi Atauro sidauk to’o iha Porto Dili, maibe sei iha tasi klaran deit, ro nia motor ida avaria ona, nune’e iha tempu ne’e kedas ro refere paradu hela iha tasi ibun Lisidere to’o agora. 

 Iha loron 2 Agusto, foin lalais ne’e, Parte Saude Distritu Dili koko ba Atauro, maibe fila husi Atauro seidauk to’o Dili, ro avaria tiha ona iha tasi klaran. 

Nia mos hateten katak, hare kondisaun ne’ebe akontese, ekipa ne’e to’o prosesu kedas fo hatene ba Ministeriu saude diretamente telephone ba kompania ba kedas identifika, mesin ne’e a’at, mesin ne’e ba sosa iha Surabaya-Indonezia. 

“Hau senti ro ida ne’ebe hetan aktividade referal, agora prezensa ro ki’ik ida iha Atauro ne’e bele ajuda aktividade klinika iha Atauro ne’ebe maka labele la’o ho kareta it abele movel ho ro ki’ik ne’e, bazeia ro ne’e it abele hata’an preokupasaun komunidade nian,” nia haklaken. 

Husi parte seluk, Vice Minitra Saude asuntu jestaun no apoio Rekursu, Maria do ceu, esplika katak, nia parte seidauk iha informasaun kona ba asuntu ne’e, maibe bainhira ro ne’e a’at duni ona, kompania ne’ebe toma konta ba ida ne’e iha responsablidade atu halo manutensaun, nune’e, bele fo apoiu ba komunidade iha Atauro. 

 “Hau seidauk hapa’ar ho problema ida ne’e, maibe karik ida ne’e los, ami iha kontratu ho kompania ne’ebe toma konta ba ro tenke responsablidade,” afirma Maria do Ceo. 

,