“Membru Governu Kabeen Boot”

.

Foto de, Presidência da República

Jornal Independente - Kuarta-feira, 21 Agusto 2013 

Prezidenti Republika (PR) Taur Matan Ruak konsidera membru Governu konstitusional ne’ebe lidera husi Primeiru Ministru (PM) Kay Rala Xanana Gusmao so kabeen boot deit, koalia ibun de’it, mangame de’it maibe halo serviso la loos. 

 Xefe Estadu deklara kestaun ne’e, iha nia deskursu ba populasaun, bainhira halo vizita ba Suku aimutin sub Distritu Turiskai, Distritu Manufahi. 

“PR husu kona ba governasaun tenki diak, diak signifika katak kordena, kaer servisu, tau matan ba servisu, tenki iha planu no rigor iha ijizente, laos ida lenga-lenga mangame ne’e ita nia nasaun 1 ba oin, koalai mak ibun boot, sasan halo arbiru, ne’e la los,” dehan Taur ba Komunidade sira liu husi nia diskursu iha Suku Aitimua, sub Distritu Turiskai, Distritu manufahi, Sesta foin lalais. Xefe Estadu ne’e mos kestiaona maka’as kona ba obras ne’ebe halo laiha kualdiade. 

Nune’e mos Taur konsidera Governu soe deit osan ba tasi, halo tiha la kleur deit halo fila fali. Tuir autoridade sira katak, kontraktor ida mai dada tiha bee, nia halo la hotu bee sai oituan de’it, sira manan osan, nia sobu tiha makina ba ne’ebe halo fali seluk. 

Maibe, kuandu ema ida la husu, la eziji no la hateten ba atak labele halo ida ne’e ba oin. Kestaun ne’e akontese, Taur konsidera falta kordenasaun diak, hakat liu autoridade lokal sira sente katak autoridade lokal sira laiha kbiit, la hatene halo buat ida, sente katak sira mesak mak halo buat ida, sente katak sira mesak mak bele halo no sira mesak maka bele halo hotu ne’e la los. 

“Uluk ita nia funu so ita hateten, so ita Hamutuk mak funu ita manan beik, matenek, kasian, riku, feto, mane, kiik boot hotu-hotu mak ita manan, ohin sira ne’ebe matenek no riku sira mesak bele halo buat hotu, sira mesak labele, so ita servisu hamutuk,” hateten Taur. 

Iha fatin hanesan, Administrador sub Distritu Turiskai, Afonso Sarmento hateten, sira lamenta tebe-tebes ba kontrator no Governu balun mai halo projeitu sein konesementu ba autoridade lokal sira. 

“Ida ne’e mak halo ami triste, tanba ne’e ami husu ba Governu ka kontraktor sira tenki respeita autoridade no populasaun iha fatin, se lae mai tia halo la hotu seo soe hela, ne’e mak ami triste,” hateten Afonso. 

.