“Membru Governu Halo Moe Estadu”

.

Jornal Independente - Kuarta-feira, 07 Agusto 2013 

Orientasaun Primeiru Ministru (PM) Xanana Gusmao ba nia membru sira hodi tuir formasaun sistema finanseiru (free balance) halo moe Estadu Timor Leste, tanba ne’e, indikador ida katak membru Governu sira la iha kapasidade. 

Diretor Interino ONG Luta Hamutuk (LH), Joaozito Viana hateten, membru governu sira ne’ebe mak tuir formasaun kona ba ezekusuan orsamentu Jeral Estadu (OJE), hatudu momos katak, membru Governu sira halo moe estadu Timor-Leste. 

Profisionalizmu ba area sira ne’ebe iha, inklui jestaun finanseiru publiku, hikus mai hatudu katak membru Governu sira laiha kapasidade. 

 “Atu remata ona tinan ida mak foin tuir formasaun, fou-foun sira la liga rai tiha, sira nia estilu ne’e mak sai sofre ba sira nia hahalok,” tenik nia iha servisu fatin, Farol-Dili. 

Joaozito hatutan tan katak, uluk membru Governu sira gabsola an katak sai ministru, sekretariu Estadu no Diretur tanba iha kapasidade, depois ikus mai sira la hatene ezekusaun orsamentu Jeral do Estadu.

Ne’e hatudu momos katak, sira halo moe estadu Timor-Leste deit hodi ejekuta orsamentu do Estado. 

Tuir Viana primeiru Ministru hili sala membru governu tanba foin primeira ves membru governu tuir formasaun kona ba kona ba ezekusaun osamentu jeral estadu. 

Ne’e duni nia husu atu hasai membru sira ne’e tanba hatudu momos ona katak sira la merese sai Ministru, sekretariu Estadu no Diretor tamba laiha kapasidade ezekuta osan estadu nian. 

Joaozito Viana haktuir katak, failansu ne’e mai husi Ministra Financas, tanba implementa sistema foun ba ezekusaun orsamentu estadu nian la involve ministeriu hothotu atu bele aprende sistema ne’e. 

.