“Deskonfia KKN Iha Komisaun Omenazen”

.

Jornal Independente - Kuarta-feira, 07 Agusto 2013 

Veteranus balun husi Distritu Baucau sente triste tanba deskonfia mosu korupsaun, Kolusaun no Nepotismu (KKN) iha komisaun Omenazen nia laran hodi kansela veteranu balun nia naran atu labele simu osan pensaun. 

Veteranu Francisco Assis (Mau-Sola), husi Suku Kaibada hateten, deskonfia mosu duni KKN iha komisaun omenazen hodi bele halo kanselamentu ba veteranu balun nia naran. 

“Hau nia naran ne’e taka sai tiha ona iha verifikasaun dadus nian, maibe to’o fali ultimo verifikasaun naran ne’e lakon tiha,” dehan nia, iha kaibada Waima’a-Baucau, Segunda (5/8). 

Nia hatutan, nu’udar veteranu sente triste ba hahalok ema balun nian ne’ebe mak kansela nia naran, maibe importante mak TL hatan ona ukun rasik aan. 

 “Se iha membru ruma (Komisaun Omenazen) mak iha odiu pesoal ho veteranu balun labele uza poder hodi halo kanselamentu, servisu ne’e tenke professional,” hateten Mau-Sola. 

Ne’e duni, nia husu Sekretariu Estadu Asuntu veteranu (SEV) atu haree didiak problema ne’ebe mak veteranus sira ne’e hasoru, husu ba Estadu atu konese didiak ema sira ne’ebe mak uluk luta ba Independensia labele naran fo deit osan depois haluha tiha sira. 

Mau-Sola konta katak, hahu iha 1974 nia servisu nu’udar milisia kontra Portugueza sira, depois halai ba ai-laran tanba iha invazaun Indonezia no rende iha tinan 1976, nune’e, nia kontinua hala’o servisu klandestina no sai mos estafeta iha Suku Kaibada Waima’a. 

Iha fatin hanesan, Domingos da Costa (Mau-Tubi) fo sasin katak, durante ne’e nia servisu hamutuk ho Mau-Sola iha tempu klandestina no sai mos estafeta uitoan, tanba neia bele simu pensaun veteranu nian, maibe estafeta la hetan. 

 “Hau hanoin ne’e la justu ona, tanba ema ne’ebe mak nu’udar ami nia estafeta la hetan fali ami bele hetan fali,” hateten Mau-tubi. 

 Nia hatutan, iha klandestina nia laran sira liu husi Mau-Sola hodi kontinua ba kaixa sira seluk no lori sasan ne’ebe mak sira fo hamutuk lori ba FALINTIL iha ai-laran.

.