“Alkatiri Deskonfia Rezidensia Ba Ministra Emilia”

.

Jornal Independente - Segunda-feira, 12 Agusto 2013

Eis Primeiru Ministru, Mari Alkatiri, sente iha buat ruma la loos konaba konstrusuan rezidensia Ministra Financas (MF), Emilia Pires ne’ebe gasta osan Estadu ho montante tokon U$1,5.

Deskonfiansa husi eis Primeiru Ministru ne’e mosu, tanba utiliza osan boot ba konstrusuan ne’e, maibe laiha konesementu husi Ajensia Dezenvolvimentu Nasional (ADN) no Ministeriu Obras Publiku (MOP).

“Halo nusa mak uma boot, ne’ebe nehek mos hatene uma ne’e, maibe governu liu-liu ADN laiha rekonesementu, ne’e iha sala ruma iha governasaun,” dehan Alkatiri iha Misquita An-nur, foin lalais ne’e.

Nia dehan, uma ne’e rasik ba Emilia maibe labele hatudu liman ba malu, se sala dehan deit sala, laiha entidade atu halo uma boot hanesan ne’e ba Ministra ou Ministru ida.

“Ita haree agora ne’e Ministra Financas Emilia Pires ne’e atu semo ba to’o iha lalehan, ita mak atu halo rezidensia ida ba to’o iha lalehan ka, ita mak fira maromak hodi ba sae to’o lalehan ne’e mak ita haree buat ne’e, ita binggung fali,” dehan Mari Alkatiri.

Nia hatutan, ema hotu hatene PR sei hela iha foho leten ne’eba iha uma kikoan ida, PM mos sei hela iha Lesidere ne’eba mos la’os uma kiik, maibe laos boot liu hanesan Emilia nia rezidensia.

 “Ita iha osan oituan mai husi minarai iha halo sasan azves ita la sukat ninia konsekuensia, dala barak ita hanoin katak dezenvolvimentu mak ida ne’e hatudu uma furak, uma boboot biar luron kuak nafatin, maibe ita buka hatudu deit mak ita sidade,” tenik Alkatiri.

Mari dehan, muda sistema mak importante la’os vontade, tamba ema hotu iha vontade atu hadia rai ne’e no povu ida ne’e.

“Tenki muda sistema governasaun, la’os de’it vontade politika, maibe sistema mak importante, ita hotu iha vontade atu halo diak liuliu ba ita nia rain ne’e ba ita nia povu, maibe kuandu ita nia sistema la fo buat ida ne’e, ema sira ne’ebe mak laiha vontade sira mak ukun fali ita, tanba isra mak iha ita nia kotuk halo tuir sira nia hakarak loos,” nia dehan.

 Nia mos husu KAK, Ministeriu Publiku, Inspektur Jeral, halo investigasaun ka lae, tanba durante ne’e investigasuan mos la’o bara-barak, maibe to’o Tribunal mos la sala hotu.

“Tanba ne’e mak hau dehan sistema tomak tenke hadia, se sistema la’o la diak it abele hari’i KAK it abele halo buat hotu, maibe povu ki’ik sira mak naok manu bele ba tama kadeia, sira bee naok hodi riku derepenti, halo uma boboot la ba kadeia,” nia dehan.

,