“Xanana Sei Hadomi Membru Governu”

.

Jornal Independente Segunda-feira, 12 Agusto 2013 

Primeiru Ministru (PM) Kay Rala Xanana Gusmao tenki adia planu remodelasaun ba membru Governu ne’ebe la hatudu prestasaun servisu pozitivu durante tinan ida. 

Remodelasaun ne’e muda ba tinan oin (2014), karik membru governu balun kontinua laiha kapasidade durante tinan rua ukun. 

Xefe Governu xanana Gusmao hatete, retiru nasional atu hadia, aprezenta programa, aprezenta orsamentu retifikativu, halo mudansa ba Ministeriu balun ne’ebe atu taka konsensu foun atu hari’i, ajustamentu kona ba funsionamentu publiku ka administrasaun publiku ne’ebe uluk muda. 

 Xefe Governu mos rekonese iha membru Governu foun no membru Governu tuan balun seidauk hatudu rezultadu servisu ba povu, nune’e nia husu atu tinan oin tenke haka’as an atu servi duni povu.

 “Servisu Bloku Koligasaun ba tinan ida ne’e ho motto hodi hadia uma laran, tau mos tema atu hadia prestasaun servisu, atu nune’e labele hamosu problema bainhira iha dalan klaran,” hateten PM Xanana liu husi konferensia imprensa, Domingu (11/08), Iha Dare. 

 “Ami rekonese durante retiru loron tolu ne’e haree ba dezempenu kada Ministeriu ida, iha segundu dia ami identifika frakeiza ka defisiensias ne’ebe membru governu sira nia servisu durante tinan ida,” dehan nia. 

Primeiru Ministru mos apresia ho membru Governu sira nia onistidade no frakeiza ne’ebe aprezenta durante retiru. 

Durante loron (3) iha Dare membru governu ho Primeiru Ministru Xanana Gusmao hala’o retiru nasional ida ho objetivu avalia servisu Bloku Koligasaun ba tinan ida. Antes ne’e, kestaun remodelasaun sai hanesan ameasa boot ba Membru Governu sira bainhira Primeiru Ministru Xanana Gusmao deklara halo remodelasaun ba membru governu ne’ebe la hatudu prestasaun servisu pozitivu, issu remodelasaun ne’e halo Ministru balun tauk hakbesik an ba PM Xanana, bainhira selebra tinan ida ba Bloku Koligasaun iha Aeroportu Komoro, Nicolau Lobato, Dili. Iha selebrasaun Bloku Koligasaun ba tina ida ne’e, Primeiru Ministru Xanana Gusmao hala’o festa simples ida ho Ministru no Sekretariu Estadu sira hodi hanoin hikas prestasaun servisu ne’ebe kada tinan membru Governu sira halo ona.

 Primeiru Ministru Xanana Gusmao konversa ho membru Governu sira kona ba preparasaun molok ba retiru nasional ne’ebe hala’o iha 09 to’o 11 iha Dare, foin lalais ne’e. 

 Iha aniversariu Bloku Koligasaun ba tina ida ne’e, iha Ministru balun tauk hakbesik aan ba Primeiru Ministru hanesan Ministru Saude Sergio Lobo, Vise Ministru Transporte no Telekomunikasaun, Flavio Cardozo, Ministra Solidaridade Sosial, Vise Ministra saude, Natalia de Araujo, Sekretariu Estadu Komersiu, Ricardo Nehu, Sekretariu Estadu Koperativa, Nino Pereira, Ministru Edukasaun, Bendito Freitas, Ministru Agrikultura no Peskas Mariano Asanami sabino, inklui Sekretariu Estadu Komunikasaun Sosial, Belio Izaq. 

Ministru ne’ebe brani dadalia ho PM Xanana mak Ministru Justisa Dionisio Babo, Ministru negosiu Estranjeiru Kooperasaun Jose Luis Guterres, Sekretariu Estadu politika Formasaun Profesional no empregu (SEPFOPE), Elidio Ximenes. 

“Imi ne’ebe lahatene ezekuta orsamnetu tenke ba toba hein iha Dare molok retiru hahu, selae hau rasik taka odamatan ba ita boot sira, ne’ebe hare tenke hatene aan, tempu halimar kuaze tinan ida remata ona, hare prepara,” katak xefe Governu ba membru Governu Kintu Konstitusional. 

Hafoin PM Xanana husik hela membru governu sira hodi hakat ba atu sae nia kareta, Ministru Turizmu no Kultura, Francisco Klabuady Lay duni tuir xefe Governu hodi dehan katak maun, maun aban retiru ne’e halo nusa?

 Xefe Governu mos husu Ministru kalbuady katak” ita hasoru malu deit iha dare”, maibe Ministru kalbuady duni tuir nafatin PM Xanana, maibe Xefe Governu la preokupa ho Ministru kalbuady nia preokupasaun. 

Antes ne’e, tuir observasaun Jornal INDEPENDENTE iha aeroportu Comoro, Nicolau Lobato nota katak, bainhira Primeiru Ministru Xanana Gusmao dada lia kona ba preparasaun ba retiru iha Dare, iha Ministru balun helik husi Ministru balun nia kotuk no lakohi hatudu aan ba Primeiru Ministru. 

Nune’e mos iha Ministru balun finzidu lao sai tiha mai liur, no lakohi rona PM Xanana nia koalia, balun finzi nonton tiha. Maibe planu remodelasaun la konsege akontese tanba, Primeiru Ministru xanana Gusmao, sei tolera nia membru atu hadia iha tinan oin.

.