“Ro Indonezia Halo Peska Ilegal Iha Timor Leste”

.

Jornal Independente - Segunda-feira, 12 Agusto 2013

Komunidade Distritu Likisa indentifika ro ida ho naran Pontianak husi Indonezia tama illegal no halo peska illegal iha Timor-Leste, prezensa ro ne’e rasik laiha konesementu husi Ministeriu Agrikultura no Peska (MAP) ho Ministeriu Transporte no Telekomunikasaun (MTT). Komunidade suku tibar, Distritu Likisau hateten, Ro ne’ebe identifika husi Kalimantan, Indnezia ne’e halo movimentu kleur ona iha area Tasi Timor nian hodi halo aktividade peska. 

Nune’e, prezensa Ro Indonezia ne’e nia halo peskador Timor-oan sira iha area Likisa tenke tata lima fuan, tanba ema illegal sira ne’e mai halo peska ho modeluteknolojia ne’ebe la fo oportunidade ba Timor-oan sira.

Zacarias de Jesus Peskador Suku Tibar hateten, ezistensia ro Pontianak husi Kalimantan, Indonezia ne’e kleur ona, maibe la klaru prezensa iha Timor Leste ne’e halo saida.

“Iha tempu kalan mak sira halo atividade peska, loron sira hadia kondisaun ro nian,” dehan Peskador ne’e.

Entertantu, Ministru Agrikultura no Peska (MAP), mariano Asanami sabino sente hakfodak bainhira rona informasaun ne’e, tanba nia rasik la hatene kona ba prezensa Ro Indonezia nian iha parte Likisa.

“Ami sei buka hatene ezizensia ro refere, tamba ami seidauk hatene prezensa ro ne’e iha Tibar, ami mos seidauk hatene klaru nia servisu halo saida, ne’ebe ami mos sei ba haree ro ne’e iha tempu badak,” tenik nia.

Tuir observaun Jornal INDEPENDENTE nota prezensa roo ne’e maioria staff mai husi Kalimantan, Indonezia hodi hala’o peska bainhira iha tempu kalan halo peskador Timoroan sente preokupa, tanba peskdor husi Indonezia kaer ikan boboot.

.