“PNTL Menus Fasilidade Halo Operasaun Ba GAM”

.

Jornal Nacional Diario - Sesta-feira, 16 Agusto 2013

Policia Nasional Timor-Leste (PNTL) iha nia operasaun hasoru aktividade Grupu Arte Marsiais (GAM) kontinua lao iha Distritu 13 maibe menus mak fasilidade.

“Hau simu infomrasaun husi komando PNTL Distritu 13 katak operasaun ba arte marsiais kontinua lao bazeia ba rezolusaun Governu nian ne’ebe hasai ona maibe problema ba PNTL mak menus fasilidade liu-liu sneter (Lampra) bo’ot atu nune’e bele uza iha tempu kalan, karik simu informasaun husi komunidade sira katak iha arte marsiais balun kontinua hala’o sira nia aktividade tenke haree no Governu tenke fasilita Policia sira para servisu lao diak liu tan,” hateten deputadu PN Mateus de Jesus husi bancada CNRT, ba Jornalista sira iha PN, Kinta (15/8).

Operasaun ba GAM ne’e bazeia ba rezolusaun Governu nia ne’ebe aprova foin lalais hodi taka totalmente aktividades arte marsiais tolu hanesan PSHT, Kera Sakti no KORK.

Deputadu ne’e hatutan, atu servisu PNTL lao ho susesu Estadu tenki fo apoiu ekipamentus tanba ho Policia nia servisu mak ohin loron rai ne’e sai hakmatek.

Iha fatin hanesan, Deputadu Bancada FRETILIN, Francisco Branco, mos hateten, Governu hasai ona rezolusaun hodi taka GAM maibe laiha atensaun ba ekipamentus Policia nian wainhira fo orden hodi halo operasaun ba arte marsiais.

“Estadu la dun iha atensaun ba ekipamentus policia sira nian, liu-liu sira ne’ebe iha Distritu ne’eba lolos ne’e tenke fasilita ekipamentus sira kumpletu atu nune’e sir abele lao iha tempu kalan no loron, ne’ebe husu Ministeriu kompotenete atu tau atensaun ba problema ne’e,” dehan Branco.

Antes ne’e komandante PNTL Distritu Dili Superitendente Xefe Pedro belo, hateten operasaun ba GAM kontinua lao iha tempu kalan no loron ka iha tempu udan, ne’ebe maske iha difikuldade maibe operasaun kontinua lao.

.