“Estrada Tokon $8 Kuak Fali Ona”

.

Jornal Independente - Tersa-feira, 27 Agusto 2013 

Estrada Ligasaun Rotunda Komoro to’o Palasiu Prezidensial ne’ebe Governu gasta osan hamutuk tokon U$8 hahu kuak fali ona, ne’e duni, komunidade sira husu ba Kompania Consorcio Nacional Timorense (CNT) ne’ebe kaer projeitu ne’e atu responsabliza. 

Zito Goncalves, komunidade aitarak-Laran hateten, estrada ne’e foin halo iha tinan ne’e, maibe seidauk halo tinan ida komesa nakloke fali ona no kuak. “Ita lahatene sira halo estrada ne’e garantia duni kualidade ga lae, foin mak uza fulan ida deit aat fali ona,” tenik nia, iha Aitarak laran foin lalais ne’e. 

Tuir nia, kompara ho kondisaun estrada ne’ebe mak halo iha tempu okupasaun Indonezia, durante tinan barak ona, maibe nia kondisaun sei diak liu fali ida ne’e mak foin halo. “Se hanesan ne’e, diak liu uluk ne’e labele sobu para gasta povu nia osan barak maibe la garante liu nia kualdiade,” nia esplika. 

Nune’e, tuir takxista David Soares katak, kondisaun hirak ne’e kuandu lakohi atu atende seriu no lalais sei hamosu dezastre ruma. 

 “Kuandu aat no kuak oituan ne’e, tenke mai hadia lalais, se lae kareta motor liu ba mai, bee mai nalihun tan, provoka nia kuak ne’e aumenta ba beibeik, ida ne’e fo ameasa boot ba kareta no motor sira,” tenik nia. 

Tuir observasaun diariu ne’e iha terenu nota katak, aliende estrada barak kuak husi Komoro to’o Ai tarak-Laran, iha parte PR nian, iha kuak rua ne’ebe mak kehe husi parte Servisu agua e saneamentu (SAS), iha semana hirak liu ba hodi hadia bee moos, depois taka deit fali ho rai. 

Ho preokupasaun hirak husi komunidade, ekipa diario ne’e tenta atu konfirma ho parte CNT no SAS nian, maibe seidauk hetan konfirmasaun ruma.

.