“MOP Renova Mekanizmu Kontrolu Projeitu Laiha Kualidade”

.

Jornal Independente - Kuarta-feira, 14 Agusto 2013

Governu Liu husi Ministeriu Obras Publiku (MOP) halo renovasaun ba mekanismu kontrola ba projeitu Governu ne’ebe kompania sira imlementa, hodi hadia dezenvolvimentu nasional ne’ebe oras ne’e la’o dadaun.

Ministru Obras Publiku, Gastao Sousa hateten, ba oras ne’e dadaun MOP ho ADN komesa ona renova mekanizmu kontrolu ba kompania sira ne’ebe kaer obra la ho kualidade.

 “Tan deit obra la iha kualidade ne’e mak foin lalais ne’e Primeiru Ministru autoriza ekipa tekniku ADN sobu projeitu ne’ebe laiha kualidade iha teritoriu tomak, hahu husi Distritu Likisa no Ermera,” dehan nia iha palasiu Governu (13/8).

Renovasaun mekanizmu kontrolu ne’e, nia dehan, Ministeriu Obras Publika halo koordenasaun ho ADN no Sekretariadu Grande projeitu inklui Komisaun Nasional Aprovizionamentu atu hametin koordenasaun servisu.

Gastao konkorda atu lori dokumentu ne’ebe hatama iha MOP ba ADN, inklui Sekretariadu Grande Projeitu ikus liu relata ba Komisaun Nasional Aprovizionamentu.

Nia dehan, koordenasaun servisu entre MOP ho ADN ne’e atu responde fallansu ne’ebe mak durante mosu iha governu anterior hodi fo impaktu ba prosesu lala’ok projeitu governu.

.