“Komisaun F PN Husu MS Hadi’a Prestasaun Servisu”

.

Jornal Independente - Kuarta-feira, 14 Agusto 2013

Mal atendimentu ba pasiente husi ospital hotu-hotu iha teritoriu laran tomak hetan atensaun seriu husi Parlamentu Nasional, tanba ne’e husu ba Ministru Saude (MS) atu hadia prestasaun servisu.

Membru Parlamentu Nasional (PN), Deputadu vergilio Hornai hateten, kondisaun material servisu medisina nian MS tenki hadia, tanba ekipamentu iha hospital barak mak aat ona.

Nia fo ezemplu, ekipamentu ba ospital hanesan kareta ambulansia barak mak durante ne’e hetan doasaun husi doador sira, ne’e duni, Ministeriu Saude tenke iha planu hodi halo reparasaun atu bele fo atendementu diak ba pasiente sira.

“Ministru Vice no Diretor sira tenki buka mellor liu tan sira nia servisu, oinsa mak bele halo planu diak atu bele solusiona problema sira hanesan fasilidade medisina ninian, aparelu no mos menus ai-moruk,” dehan Deputadu Virgilio, iha uma fukun PN (13/8).

Tuir nia, funsionariu hotu-hotu iha Ministeriu Saude nia laran tenke servisu entregadu atu bele apoiu malu hodi hetan susesu ba servisu tomak. Virgilio hatutan, ekipamentu servisu ne’ebe Ministeriu saude fo ba ospital sira la iha kualidade hodi bele prejudika servisu ospital sira nian.

Nia fo ezemplu hanesan ro ambulansia ne’ebe entrega ba sentru saude Dili laiha kondisaun diak entaun ro ne’e labele halo operasaun hodi fo asistensia ba pasiente sira iha tasi sorin Atauro.

Kazu seluk, bainhira Komisaun B PN dezloka ba Distritu Baucau, iha pasiente ida ne’ebe hetan dezastre trafiku presiza atu halo operasaun iha Dili, tanba labele atende iha Baukau, maibe laiha ambulansia ruma atu bele tula pasiente ne’e mai Dili.

Husi problema hirak ne’e deputadu Virgilio kontinua fo atensaun ba Ministeriu saude atu bele buka solusaun hodi rezolve problema hirak ne’ebe mosu iha instituisaun ne’e nia laran.

,