“La Hadia Failansu Promosaun Deviza, Ofisial PNTL Sei Lori Ba Tribunal”

.

Jornal Independente - Kinta-feira, 22 Agusto 2013

Inspetor ida husi Polisia Nasional Timor-Leste (PNTL), sei lori kazu promosaun deviza ba pozisaun inspetor no inspetor Xefe sira ba Tribunal kuandu komisaun promosaun Extraordinariu la hadia failansu sira ne’ebe akontese.

Tinan kotuk, Governu nia komisaun promosaun Extra-ordinaria PNTL hahu kria prosesu testu promosaun deviza ba membru no ofisial Polisia sira.

Komisaun ne’e kompostu husi lider PNTL balun, reprezetante husi Sekretariadu Estadu Seguransa no Reprezetante sosiedade sivil balun, loke testu iha 19 Nivembru 2012. Iha 6-7 Dezembru 2012, komisaun fo testu eskrita no intervista ba ofisial sira kona-ba avaliasaun Pisikolojia, iha 15 Janeiru 2013, komisaun kria prosesu intervista ida tan. Iha 11 Marsu, ofisial sira tuir kursu semana tolu iha Akademia PNTL, Komoro.

Entertantu, pozisaun sargentu no Ajente sira tuir deit testu eskrita kona ba konesementu professional no intervista no eskrita. Iha Marsu 2013 komisaun hasai rezultadu testu, ne’ebe polisia barak mak liu hodi hetan diviza foun no barak mak la liu.

Antes ne’e, membru polisia balun hateten sira hetan valor diak iha testu maibe sira nia deviza la aumenta, balun hasae oituan deit, maibe ofisial balun hetan valor kiik iha testu maibe sir abele hetan deviza ne’ebe a’as.

Nune’e, Uniku Ofisial feto ida, Inspetor Cesaltina Soares, S. Sos, M.AP mak hakarak hakbesik a’an ba Tribunal hodi buka lia los kuandu komisaun la hadia buat sira ne’ebe la la’o ho diak. Nia hkabesik an ba Tribunal tanba nia la satisfas ho rezultadu promosaun deviza ne’ebe nia hetan tanba nia valor testu ne’e boot liu fali ofisial balun ne’ebe hetan deviza a’as, liu fali nia maske sira hetan valor testu ki’ik.

“Ema balun ne’ebe Notas kiik husi hau, maibe sira bele hetan inspetor xefe,” dehan nia ho tristeza. Tuir nia katak, Komisaun ba promosaun la haree didiak valor ne’ebe iha molok foti desizaun no hili ema tuir nia gostu deit.

 Nune’e Inspetor Celestina hateten katak, nia parte hato’o ona karta protesta ba Prezidenti Komisaun Isabel Ferreira, Komandante Jeral PNTL Longuinhos Monteiro, halo ona inkeretu ho Inspetor Cesaltina tanba desizaun hakerek karta protesta ba Primeiru Ministru ne’e la tuir regra, inkeretu neebe halao iha 9 maiu ne’e, Ajente xefe Maria Castro mak intervista Inspetor Cesaltina.

.