La Akontese Remodelasaun, “Alkatiri: Hau Lakohi Hatama Kanuru Tohar”

.

Jornal Nacional Diario - Sesta-feira, 16 Agusto 2013 

Eis Primeiru Ministru (PM) Timor Leste Dr. Mari Alkatiri deklara, nia parte la kohi mete (Hatama kanoru tohar-red) ba asuntu remodelasaun ne’ebe la akontese, tanba kuandu iha remodelasaun mos FRETILIN sei la partisipa. 

Maske nune’e, antes ne’e Primeiru Ministru (PM) Kay Rala Xanana Gusmao deklara sei halo remodelasaun tanba nota membru Governu balun servisu sabraut alias halo ulun moras deit. 

 “Hau dehan dala barak katak remodelasaun formasaun Governu ne’e kompetensia Primeiru Ministru nian, hau lakohi hatama hau nia kanoru tohar ba buat ida ne’e, hau dehan dala uluk kedas katak, remodelasaun ka la remodelasaun FRETILIN sei la tama iha Governu, I bah au remodelasaun signifika la’os muda ema deit maibe tenki muda mos politika, tenki muda sistema, tenki halo buat ida ke klean tebes ke signifika sestu Governu laos Kintu Governu ona,” deklara eis Primeiru Ministru Dr. Mari Alkatiri ba Jornalista sira iha Timor Plaza, Dili Kinta (15/8). 

Nia hateten, se karik nia mak assume PM sei halo duni remodelasaun, tanba hare servisu membru governu sira lao la diak liu. “Hau nia opiniaun, hau mak primeiru Ministru hau halo duni remodelasaun ona tanba Governu ida ne’e la funsi ho diak, maibe ne’e asuntu Primeiru Ministru Xanana ninian laos hau nian,” nia koalia. 

Alkatiri hateten, dala ruma entidades balun kritika FRETILIN halo kritika ba lalaok servisu membru Governu sira ne’ebe la’o la dun diak, maibe FRETILIN sei la nonok kuandu buat balun lao lalos. 

“Ema balun dehan opozisaun labele kahur nia kanuro tohar iha Bloku ne’e ninia koligasaun, lae, bloku koligasaun laos nain ba rai ida nee, rai ida ne’e nia nain mak ita hotu no povu tomak, portantu se governu lao la los sidadaun hotu-hotu ida idreitu atu halo kritika, apalagi opozisaun ida ke mak hahu liberta rai ida ne’e, opozisaun ida ke hakarak kore povu husi kiak iha direitu atu koalia,” afirma Alkatiri.

.